ԵՄ ինտեգրման 3 սպառնալիքները. ուշագրավ կետեր՝ Արմեն Ռուստամյանի ելույթից

Ստորև ներկայացնում ենք ՀՅԴ Բյուրոյի քաղաքական ներկայացուցիչ, ԱԺ «Հայաստան» խմբակցության պատգամավոր Արմեն Ռուստամյանի ելույթի ուշագրավ կետերը, որոնք առնչվում են Փաշինյանի իշխանության կողմից ԵՄ անդամակցության գործընթացի մեկնարկով պայմանավորված խնդիրներին ու սպառնալիքներին.

• Մենք սկսում ենք մի գործընթաց, որը տեսանելի ապագայում հեռանկար չունի:
• Մենք մեզ համոզում ենք, որ նպատակը լավն է, և դրանով արդարացնում ենք գործընթացը, որն ինքնին խիստ խոցելի է:
• ԵՄ անդամակցության գործընթացով պայմանավորված 3 լրջագույն խնդիրներն են.

1. առաջարկվող գործընթացը չի համապատասխանում ԵՄ անդամակցության առկա գործընթացին, որը երկկողմանի պրոցես է,
2. «և, և»-ը փոխարինում ենք «կամ, կամ»-ով,
3. ՀՀ-ԵՄ համագործակցության լավագույն ձևաչափ հանդսացող Հայաստան-ԵՄ համապարփակ և ընդլայնված գործընկերության համաձայնագիրը (CEPA) այսօր ուզում ենք փոխարինել ԵՄ անդամակցության նոր գործընթացով:

• ԵՄ անդամակցության ցանկությունը որոշ երկրներ անգամ իրենց Սահմանադրության մեջ են ամրագրել (օրինակ՝ Վրաստանը), սակայն տեղ չեն հասնում տասնամյակներ շարունակ,
• ՀՀ-ն ԵՄ գործընթացը սկսել է միակողմանի՝ դրանից բխող անիրատեսական հեռանկարներով,
• ԵՄ անդամակցությունը հեռանկար չունի, բայց բուն գործընթացը հղի է լրջագույն սպառնալիքներով,
• այն դեպքում, երբ «կամ, կամ»-ի կողմերը պատերազմի մեջ են, ներկա պայմաններում անթույլատրելի է անել քայլեր, որոնք ՀՀ-ն կկանգնեցնեն «կամ, կամ»-ի ընտրության առջև,
• ակնհայտ է, որ ՀՀ-ն չի՛ կարող միաժամանակ անդամակցել մի միմյանց հետ անհամատեղելի կառույցներին. արդեն իսկ ՀՀ-ին ասվում է՝ եթե մեկնարկ եք տվել անդամակցելու ԵՄ-ին, ապա մեկնարկեք նաև ԵԱՏՄ-ից և այլնից դուրս գալու գործընթացը,
• գործընթացի արդյունքը հետևյալն է լինելու՝ ո՛չ հասնելու ենք ԵՄ, ո՛չ ամրապնդվելու ենք ԵԱՏՄ-ում, լինելու ենք արանքում կախված,
• ԵՄ ինտեգրման գործընթացը պետք է տեղի ունենա այն տրամաբանությամբ, որ ՀՀ-ն պատրաստ է ԵՄ-ին մոտ լինել այնքանով, որքանով ոչ թե ԵՄ-ն է դա հնարավոր համարում, այլ այնքանով, որքանով դա չի սպառնում ՀՀ անվտանգությանը և լինելիությանը,
• Փաշինյանի իշխանությունը խաբում է ժողովրդին, երբ ասում է՝ «ԵՄ, թե ՌԴ». մեր անվտանգության կամ խաղաղության «երաշխավորը» դառնում է ոչ թե ԵՄ-ն, այլ Թուրքիան,
• գործընթացով հայ ժողովրդին իշխանությունը դնում է «Թուրքիա, թե ՌԴ» ընտրության առջև,
• գործընթացով մենք հաստատապես կկորցնենք այն, ինչը հիմա ապահովում է մեր կենսունակությունը,
• գործընթացով ունքը շտկելու փոխարեն աչքն էլ ենք հանում, քանի որ գործընթացի ժամանակ կարող է անգամ ԵՄ-ն այլևս գոյություն չունենա,
• ԵՄ արժեքները սահմանված են նաև CEPA-ով, եթե կա ինտեգրման ցանկություն, ապա պետք է իրագործել CEPA-ով նախատեսվածը,
• աբսուրդ է՝ մենք դեռ CEPA-ով նախատեսվածիւ 40%-ն էլ չիրագործած, ուզում ենք անդամակցության գործընթաց սկսել՝ այն դեպքում, երբ մենք չափազանց հեռու ենք ԵՄ չափանիշներից:

Ստորև՝ ելույթի տեսագրությունը.