Թրամփը ցանկանում է հնարավորինս շուտ հանդիպել Պուտինին

ԱՄՆ նախագահ ընտրված Դոնալդ Թրամփը ցանկանում է հնարավորինս շուտ հանդիպել Ռուսաստանի առաջնորդ Վլադիմիր Պուտինին։ Նա այդ մասին ասել է «Newsmax» հեռուստաալիքի հետ զրույցում։

«Ես գիտեմ, որ նա ցանկանում է հանդիպել, և ես պատրաստվում եմ շատ շուտ հանդիպել: Կցանկանայի, որ դա ավելի շուտ տեղի ունենա: Բայց նախ պետք է ստանձնել պաշտոնը», - նշել է Թրամփը:

Թրամփի ապագա խորհրդական Մայք Ուոլցը «ABC News»-ին ասել է, որ Ռուսաստանի առաջնորդի և ԱՄՆ նորընտիր նախագահի միջև հեռախոսային բանակցություն կարող է տեղի ունենալ մոտ ապագայում։

Թրամփն ավելի վաղ հայտարարել էր, որ կցանկանար Պուտինին հանդիպել իր նախագահության առաջին վեց ամիսների ընթացքում։ ՌԴ նախագահի մամուլի քարտուղար Դմիտրի Պեսկովը նշել է, որ Պուտինը պատրաստ է հանդիպել ԱՄՆ նոր գործընկերոջ հետ առանց որևէ պայմանի, թեև, ըստ նրա, դեռ որևէ կոնկրետություն չկա։