Ադրբեջանական ուղևորատար ինքնաթիռի կործանման հետևանքով հաղորդվում է 38 մարդու մահվան մասին

Ղազախական Ակտաուում Azerbaijan Airlines-ի ուղևորատար ինքնաթիռի կործանման հետևանքով զոհվածների թիվը 38 է։  Այդ մասին հայտնում են ղազախական լրատվամիջոցները:

Ինչպես արդեն հայտնել ենք՝ Բաքվից Գրոզնի թռչող Embraer 190 ինքնաթիռը դեկտեմբերի 25-ի առավոտյան վթարի է ենթարկվել Ղազախստանի արեւմուտքի Ակտաու քաղաքի մոտակայքում: Ինքնաթիռում եղել է 62 ուղևոր և անձնակազմի հինգ անդամ։ Հաղորդվում է, որ ուղևորներից 16-ը ռուս են, 37-ը՝ Ադրբեջանի, 6-ը՝ Ղազախստանի, 3-ը՝ Ղրղզստանի քաղաքացիներ: Ռուսաստանի 9 քաղաքացիներ գտնվում են հիվանդանոցներում, հայտնում է Ղազախստանի արտակարգ իրավիճակների նախարարությունը:

Ադրբեջանի նախագահ Իլհամ Ալիևի մամուլի ծառայությունը հայտնել է, որ օդանավը վատ եղանակի պատճառով փոխել է ուղղությունը: Ակտաուում վայրէջքի ժամանակ վթար է տեղի ունեցել։ Ալիևը ընդգծել է, որ տեղի ունեցածի տարբեր վարկածներ կան եւ կոչ  արել սպասել հետաքննության ավարտին: Ի թիվս այլ բաների, հաղորդվել է թռչունների հետ ինքնաթիռի բախման մասին։