Դատարանը ցմահ ազատազրկման դատապարտեց ոստիկանության գնդապետ Դանիել Դանիելյանին

Երևան քաղաքի առաջին ատյանի ընդհանուր իրավասության դատարանը ցմահ ազատազրկման է դատապարտել ոստիկանության գնդապետ Դանիել Դանիելյանին։ Տեղեկությունը հայտնում է ՀՀ գլխավոր դատախազությունը։

Նա 2018 թվականի մայիսին մտել էր «HSBC բանկ Հայաստան» ՓԲԸ-ի «Կոմիտաս» մասնաճյուղ` 500 հազար դոլար հափշտակելու նպատակով, սպանել էր բանկի անվտանգության աշխատակիցներից մեկին և 1 ոստիկանի, վնասվածք հասցրել մեկ այլ աշխատակցի։

Դատախազը 2024 թվականի մարտի 5-ին իր ճառով միջնորդել էր Դանիել Դանիելյանին մեղավոր ճանաչել առանձնապես խոշոր չափերով գույք հափշտակելու նպատակով կատարած ավազակության, այլ հանցանքը թաքցնելու և դրա կատարումը հեշտացնելու նպատակով ծառայողական գործունեության կատարման մեջ գտնվող երկու անձանց նկատմամբ շահադիտական դրդումներով սպանության, սպանության փորձ կատարելու և ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, պահելու, փոխադրելու կամ կրելու համար և մեղադրյալի նկատմամբ վերջնական պատիժ նշանակել ցմահ ազատազրկումը:

Դատարանի՝ 2024 թվականի դեկտեմբերի 13-ի դատավճռով, Դանիել Դանիելյանը մեղավոր է ճանաչվել և նրա նկատմամբ վերջնական պատիժ է նշանակվել ցմահ ազատազրկումը: