Իսրայելի հարվածները Սիրիային խախտում են միջազգային իրավունքը․ ՄԱԿ-ի հատուկ զեկուցող

Նախագահ Բաշար ալ Ասադի հրաժարականից հետո Իսրայելի օդային հարվածները Սիրիայում տասնյակ օբյեկտների վրա միջազգային իրավունքի կոպիտ խախտում են։ Նման կարծիք է հայտնել ահաբեկչության դեմ պայքարում մարդու իրավունքների պաշտպանության հարցերով ՄԱԿ-ի հատուկ զեկուցող Բեն Սոլը։

Նրա գնահատականներով՝ միջազգային իրավունքում «բացարձակապես հիմք չկա որևէ երկրի կանխարգելիչ զինաթափման համար»՝ նրա հետ ոչ բարեկամական հարաբերությունների հիման վրա։ 

«Եթե դա այդպես լիներ, ապա դա կլիներ ամբողջ աշխարհում քաոսի բանալին», - մեջբերում է AFP գործակալությունը, - սա լիովին անօրինական է:

Հիշեցնենք՝ դեկտեմբերի 8-ին իսրայելցի զինվորականները վերահսկողության տակ են վերցրել Գոլանի բարձունքներում գտնվող Հերմոն լեռնաշղթայի սիրիական կողմը։ Իսրայելի վարչապետ Բենիամին Նեթանյահուի խոսքով՝ Սիրիայի հետ 1974 թվականին ստորագրված ուժի բաժանման համաձայնագիրը անվավեր է դարձել, քանի որ սիրիական զորքերը Դամասկոսում իշխանափոխությունից հետո լքել են տարածքը։

Նույն օրը Kan Radio-ն հաղորդել է, որ իսրայելական ավիացիան հարվածներ է հասցրել Սիրիայում տասնյակ թիրախների, այդ թվում՝ հակաօդային պաշտպանության համակարգերի և բալիստիկ հրթիռների արտադրության օբյեկտների: Reuters-ի փոխանցմամբ՝ գնդակոծության է ենթարկվել նաեւ Դամասկոսի հետազոտական ​​կենտրոնը, որտեղ իբր իրանցի մասնագետները հրթիռներ էին մշակում։ Դեկտեմբերի 9-ին Al Arabiya հեռուստաալիքը հայտնել է, որ Իսրայելի ռազմաօդային ուժերը հարձակվել են սիրիական ամենամեծ ավիաբազաների վրա։