ՌԴ ԱԳՆ-ն մեկնաբանել է Վրաստանի դեմ պատժամիջոցներ սահմանելու Բալթյան երկրների ծրագրերը

Մոսկվան բացասաբար է վերաբերվում ինքնիշխան պետությունների գործերին միջամտելու ցանկացած փորձի, ասել է ՌԴ փոխարտգործնախարար Միխայիլ Գալուզինը` մեկնաբանելով Վրաստանում բողոքի ակցիաների հետ կապված պատժամիջոցներ կիրառելու Բալթյան երկրների ծրագրերը, փոխանցում է РИА Новости-ն։

«Այն, ինչ տեղի է ունենում, ըստ էության, Վրաստանի ներքին խնդիրն է։ Ես կցանկանայի սահմանափակել իմ մեկնաբանությունը միայն այսքանով»,- լրագրողներին ասել է Գալուզինը:

Ավելի վաղ Էստոնիայի արտաքին գործերի նախարարության ղեկավար Մարգուս Ցահկնան հայտարարել էր, որ Լիտվան, Լատվիան և Էստոնիան ազգային պատժամիջոցներ կսահմանեն Վրաստանում բողոքի ցույցերը ճնշելու մեջ ներգրավված անձանց դեմ։

Հիշեցնենք` նոյեմբերի 28-ին, երբ հայտնի դարձավ, որ Վրաստանի իշխանությունները որոշել են մինչև 2028 թվականը օրակարգից հանել Եվրամիությանն անդամակցելու շուրջ բանակցությունները, Թբիլիսիում և մի քանի այլ խոշոր քաղաքներում բողոքի ակցիաներ սկսվեցին: