Իսպանիայում ջրհեղեղից տուժածների թիվը կարող է ավելի շատ լինել

Պաշտոնական տվյալներով՝ Իսպանիայում ջրհեղեղի զոհ է դարձել առնվազն 72 մարդ, հայտնում է Euronews-ը։

Իշխանությունները չեն բացառում, որ զոհերի թիվը կարող է իրականում ավելի շատ լինել։ Հորդառատ անձրևները մոլեգնել են երկրի արևելյան և հարավային շրջաններում։

Սոցցանցերում հրապարակվում են կադրեր, որտեղ երևում է՝ ինչպես են ջրի հոսքերը քշում-տանում կամուրջներն ու ավտոմեքենաները։

Մայրուղիները հեղեղված են: Վալենսիայի և Մադրիդի միջև երկաթուղային կապը խափանվել է: Մալագայի մոտակայքում մոտ երեք հարյուր ուղևոր տեղափոխող արագընթաց գնացքը ռելսերից դուրս է եկել։ Իշխանությունները հայտնել են, որ տուժածներ չկան:

Աղետի շրջաններ են ուղարկվել հազարից ավելի զինվորականներ։ Նրանք օգնություն են ցուցաբերում շտապ արտակարգ ծառայություններին։ Փրկարարները մարդկանց տարհանելու համար նավակներ և ուղղաթիռներ են օգտագործել։ Դժվար հասանելի վայրերում զոհերին որոնում են անօդաչու սարքերի միջոցով։

Օդերևութաբանների կանխատեսումներով՝ անձրևները կտևեն մինչև հոկտեմբերի 31-ը։ Գիտնականները ենթադրում են, որ եղանակային արտառոց երևույթներն ավելի տարածված են դառնում կլիմայի փոփոխության պատճառով:

ԵՄ-ն աղետի հետևանքների դեմ պայքարի համար օգնություն է առաջարկել Իսպանիային: