Նեոլիբերալ կոսմոպոլիտիզմով վարակված ՔՊ-ական վարչախումբը հիմա էլ «պետական» բառն է հակադրում «ազգային» բառին․ Կարեն Խանլարի

Ո՛չ ազգային, ո՛չ պետական

«Մշակութային օրենսդրության հիմունքների մասին» օրենքում լրացումներ և փոփոխություններ կատարելու մասին օրենքի նախագիծն ԱԺ Գիտության, կրթության, մշակույթի, սփյուռքի, երիտասարդության և սպորտի հարցերով հանձնաժողովի նիստում ներկայացրեց ԿԳՄՍ փոխնախարարը:

«Արժևորելով պետությունը, պետականությունը և պետական արժեքները՝ մենք առաջարկում ենք, որ օրենքում «ազգային» բառը փոխարինվի «պետական» բառով: Հիմնարկությունները՝ թատրոնները, դահլիճները, որոնք մինչև այս կրում էին ազգային բառը, կկրեն պետական բառը»,- ասաց փոխնախարարը:

Փոխնախարարը հավելեց. «Պետք է լինի պետական գործունեության հասկացություն: Եթե որևէ թատրոն ունի պետական կարգավիճակ, ապա իր գործունեությունը պետք է լինի համապետական»:

ԿԳՄՍ նախարար Ժաննա Անդրեասյանն էլ ընդգծեց. «Հաշվի առնելով այն հանգամանքը, որ պետությունը բարձրագույն արժեք է՝ մենք առաջնորդվում ենք նրանով, որ մեր սանդղակը պետք է կարգաբերենք պետության համեմատ: Օրենքի նախագիծը հենց այս գաղափարն է արտացոլում» (1):

Ո՜վ զարմանահրաշ բան, ո՜վ աբսուրդ, ո՜վ անհեթեթություն․․․

Ի՞նչ կլիներ, եթե ԿԳՄՍ նախարության պետականագիտական այս մոտեցումները կիրառվեին օրինակ Իռլանդիայի հանրապետությունում, ուր մշակութային պետական ութ հաստատությունից հինգի անվան մեջ առկա է «ազգային» բառը (2)։

Ի՞նչ կլիներ, եթե նման մի «հանճարեղ» նախագիծը ներկայացվեր Միացյալ Թագավորության օրենսդիր պալատ, որի թվով 38 պետական թանգարաններից 12-ի անվան մեջ նույնպես կա «ազգային» բառը (3)։

Ավելին՝ աշխարհի 60 պետությունից 51-ի պետական թատրոնների անվան մեջ գոյություն ունի «ազգային» բառը։ Սույն պետություններից մի քանիսը ունեն մեկից ավելի պետական թատրոն և այսպիսով տվյալ 60 պետության մեջ աշխատում է 100 պետական թատրոն, որից 84-ի անվան մեջ հստակորեն ամրագրված է «ազգային»-ը (4)։ Այդ երկրների պետական այրերը չգիտե՞ն, արդյոք․ «որ պետությունը բարձրագույն արժեք է»։

Նեոլիբերալ կոսմոպոլիտիզմով վարակված ՔՊ-ական վարչախումբը երեկ «իրական» Հայաստանը հակադրում էր «պատմական»-ին, իսկ այսօր «պետական» բառն է հակադրում «ազգային» բառին։

Այս պարադոքսալ կեղծ երկընտրանքից որևէ ուղղություն անխուսափելիորեն հանգեցնում է ե՛ւ ազգայինի, ե՛ւ պետականի բացառմանը և Հայաստանի ազգային պետականության իսպառ կործանմանը։

______________________________

1) տես՝ https://detq.info/web/ru/node/8397

2) տես՝ https://www.gov.ie/.../public.../03d30-cultural-institutions

3) տես՝ https://en.wikipedia.org/.../National_museums_of_the...

4) տես՝ https://en.wikipedia.org/wiki/List_of_national_theatres

Կարեն Խանլարի (Խանլարյան)

Իրանի Իսլամական Հանրապետության Խորհրդարանի նախկին պատգամավոր (2012-2020թթ.),

տեխնիկական գիտությունների դոկտոր պրոֆեսոր, պատմական գիտությունների թեկնածու,

ՀՅԴ պաշտոնաթերթ «Դրօշակի» նախկին խմբագիր