102 սպանդանոց, 18-ը՝ չգործող. ՍԱՏՄ-ի գրանցած խախտումները և պահանջները

Հայաստանի Հանրապետությունում, ըստ օրենքի, պարտադիր պայման է սպանդային ծագման մսի իրացումը։ 

ՀՀ սննդամթերքի անվտանգության տեսչական մարմնի  իրազեկման, խորհրդատվության և հանրության հետ տարվող աշխատաքների բաժնի պետ Անուշ Հարությունյանը Yerkir.am-ի հետ զրույցում նշեց, որ ՀՀ-ում գրանցված է 102 սպանդանոց, որից 18-ն այս պահին չեն գործում։

Դրանց քանակը ըստ մարզերի կարող եք տեսնել ստորև.

Գրաֆիկը՝ Yerkir.am-ի

ՍԱՏՄ ներկայացուցչի տեղեկացմամբ՝ պետական վերահսկողության շրջանակում  2023 թ. ընթացքում արձանագրվել է՝ սպանդանոցներում՝ 7, իսկ մսի իրացմամբ զբաղվող կազմակերպություններում և անձանց մոտ՝ ավելի քան 250 խախտում:

Սպանդանոցներում հայտնաբերվել է սառցախցիկների, ինչպես նաև նախասպանդային և դրան հարակից տարածքի սանիտարահիգիենիկ անբավարար վիճակ, վնասազերծման կամ ուտիլիզացման եղանակների մասին մսեղիքի վրա դրվող կնիքի բացակայություն: Մորթից գոյացած մսեղիքը և ենթամթերքները իրացման ցանց են ուղարկվել առանց անասնաբուժասանիտարական փորձաքննության ենթարկելու՝ ներկանյութերի և իմերսիոն յուղի բացակայության պատճառով։ Նշված թերությունները շտկելու համար տնտեսավարող սուբյեկտներին տրվել են հանձնարարականներ, որի կատարման արդյունքում կանխվել է մսեղիքի խաչաձև աղտոտման վտանգը:

Մսի ոչ սպանդանոցային ծագման նկատմամբ վերահսկողության շրջանակներում հայտնաբերվել է առանց ուղեկցող N5 ձևի անասնաբուժական վկայականի, առանց դրոշմակնիքների, ինչպես նաև ոչ սառնարանային պայմաններում իրացվող մսեղիք: Խախտումներ հայտնաբերելուց անմիջապես հետո տրվել են հետկանչման, ոչնչացման կամ օգտահանելու մասին կարգադրագրեր:

Խոսելով դրոշմակնիքների խախտումների մասին՝ տիկին Հարությունյանը ընդգծեց՝ համաձայն Մաքսային միության հանձնաժողովի 2011 թվականի դեկտեմբերի 9-ի «Սննդամթերքի անվտանգության մասին» տեխնիկական կանոնակարգն ընդունելու    N880 որոշման՝ այն դեպքում, երբ սննդամթերքն իրացվում է սպառողական փաթեթվածքի մեջ չփաթեթավորված, վաճառողը պարտավոր է այդ արտադրանքի մասին տեղեկատվությունը հասցնել սպառողին։ Հաշվի առնելով այն, որ թարմ միս-մսեղիքի դրոշմակնիքով հատվածը կարող է վաճառված լինել, այդ խմբաքանակի մյուս՝ մասնատված, կտորների մոտ պետք է տեղադրված լինի տեղեկատվական թերթիկ, որտեղ  պետք է նշվեն հետևյալ տվյալները.  

• կենդանու մսի տեսակը (որից ստացվել է սպանդոցային ծագման մթերքը), մթերքի անվանումը, մսեղիքի, կիսամսեղիքի, քառորդված մսեղիքի և մսի կտորների ջերմային վիճակը («պաղեցված», «սառեցված»), մսեղիքի անատոմիական հատվածը (մսի կտորների համարը),
• սպանդանոցի անվանումը և գտնվելու վայրը,
• սպանդանոցային ծագման մթերքի քանակը, արտադրման ամսաթիվը, պիտանելիության ժամկետը և պահման պայմանները:

Տեղեկատվական թերթիկի բացակայությունն առաջացնում է վարչական պատասխանատվություն:

Լիլիթ Մուրադյան

Խ. Աբովյանի անվան ՀՊՄՀ,

կուլտուրայի ֆակուլտետ,

լրագրության բաժին, 3-րդ կուրս