Հայաստանի անվտանգության սպառնալիքն իրենց հայտարարություններն են. Արթուր Մոսիյան

Ալեն Սիմոնյանին և իր թիմին Արցախն ընդհանրապես պետք չէր, ոչ մի կառույց էլ իրենց պետք չէր Արցախից։ Պայքարում էին սրա համար և ստացան։ Հայաստանի անվանգության սպառնալիքը իրենց հայտարարություններն են, ոչ թե Արցախի պետական ինստիտուտների պահպանումը, ինչպես Ալեն Սիմոնյանն էր ասում։ Այս մասին այսօր MediaHub-ի հետ զրույցում ասաց Արցախի ԱԺ ՀՅԴ խմբակցության ղեկավար Արթուր Մոսիյանը՝ խոսելով ՀՀ ԱԺ նախագահ Ալեն Սիմոնյանի այն հայտարարության մասին, թե Արցախի պետական ինստիտուտները Հայաստանում զարգացնելը ուղիղ սպառնալիք է և հարված։ 

«Միանշանակ պետք է Արցախի պետական կառույցները պահպանել և շարունակել աշխատանքը»,-ասաց նա։ 

Հարցին՝ ինչպե՞ս է Մոսիյանը մեկնաբանում այդ աշխատանքը այն դեպքում, եթե Արցախը չկա, վերջինս պատասխանեց․ 

«Արցախը չկա, բայց արցախցիներն իրավունքներ ունեն, որովհետև ստիպված են լքել իրենց հողը։ Իսկ ով պետք է այդ իրավունքներին տեր կանգնի, եթե ոչ Արցախի ժողովրդի ընտրած խորհրդարանը»։

Ինչ վերաբերում է հարցին, թե արդյոք նախագահ Սամվել Շահրամանյանի հետ հանդիպումներ եղել են, պատգամավորը պատասխանեց, որ բոլորի հետ են հանդիպումներ ունենում։

Նա նաև հայտնեց, որ արցախցի պատգամավորների մեծ մասը Հայաստանում են և պետք է շարունակեն իրենց գործունեությունը։