Հայրենիքը վաճառած իշխանության ներկայացուցիչները վերջին օրերին կրկին փորձում են սրել իրավիճակն Ախուրյան համայքում. Մհեր Մելքոնյան

Հայրենիքը վաճառած իշխանության ներկայացուցիչները վերջին օրերին կրկին փորձում են սրել իրավիճակն Ախուրյան համայքում։

Չհամակերպվելով 2021 թվականի տեղի ունեցած ընտրությունների արդյունքների հետ՝ ՔՊ-ականները ԱԺ-ի պատգամավոր Կարեն Սարուխանյանի և Շիրակի մարզպետ Մուշեղ Մուրադյանի «քավորությամբ» փորձում են զոռբայությամբ և անամոթաբար իշխանությունը զավթել Ախուրյան խոշորացած համայնքում։

«Ապագա կա» կարգախոսը Շիրակի մարզի ՔՊ-ական խունտայի ներկայացուցիչները փորձում են պարտադրել նաև ախուրյանցիներին։

Հիշեցնեմ, որ Ախուրյան խոշորացվող համայնքի ղեկավարի պաշտոնի համար 2021 թվականի ՏԻՄ ընտրություններում 3 քաղաքական ուժ էր պայքարում՝ «Քաղաքացիական պայմանագիրը» կուսակցությունը, «Հաղթանակ» եւ «Ախուրյան» դաշինքները: Ախուրյան խոշորացված համայնքում իշխանություն ձեւավորելու համար «Հաղթանակ» եւ «Ախուրյան» դաշինքները հուշագիր են ստորագրել: Կոալիցիա կազմած երկու ուժերը ստացել են համայնքի ավագանու 27 մանդատից 14-ը, ՔՊ-ին բաժին է հասել 13-ը մանդատ:

«Ախուրյան» դաշինքը գլխավորող ՀՅԴ անդամ Արծրուն Իգիթյանը , ով ընտրվեց Ախուրյան խոշորացված համայնքի համայնքապետ,դարձավ չափազանց անհարմար գործող նիկոլական իշխանության համար։

Ինչպես տարի ու կես առաջ,այնպես էլ այս օրերին իշխանական տարբեր չինովնիկներ, հնարավոր և անհնարին բոլոր միջոցներով փորձում են իրականացնել կոալիցիայից մեկ մանդատ պոկելու օպերացիան։

Իմ մոտ տպավորություն է ստեղծվում, որ մարզային իշխանության ներկայացուցիչները քարտ-բլանշ են ստացել ընդդիմադիր համայնքի ղեկավարներին «ոչնչացնելու» համար ՝ վստահ լինելով և հավատալով, որ միայն նրանք կարող են երջանիկ ապագա ապահովել Շիրակի մարզի ազգաբնակչությանը։

Բայց պետք է հիասթափեցնեմ մերօրյա էժանագին ՔՊ-ական գործիչներին՝ «Հաղթանակ» եւ «Ախուրյան» դաշինքները միախոհ են, հետքայլ չեն անելու, թե՛ դաշինքների ղեկավարները, թե՛ ավագանու անդամներն ամուր են իրենց որոշոմներում և գործողություններում։

Եվ լավ իմացեք, թույլ չենք տալու, որ խարդախ ճանապարհներով Ախուրյանում էլ զավթեք իշխանությունը։

Կարմիր գիծն այլեւս վաղուց հատված է....

Մհեր Մելքոնյան

ՀՅԴ Շիրակի մարզային կոմիտեության ներկայացուցիչ