Ուկրաինայում հատուկ ռազմական գործողությունը կարող է տևական գործընթաց դառնալ. Պուտին

Ռուսաստանի նախագահ Վլադիմիր Պուտինը հայտարարել է, որ Ուկրաինայում հատուկ ռազմական գործողությունը կարող է տևական գործընթաց դառնալ։ Այս մասին նա ասել է ՌԴ նախագահին առընթեր մարդու իրավունքների խորհրդի անդամների հետ հանդիպման ժամանակ։ Այս մասին հայտնում է interfax.ru-ն:

«Ինչ վերաբերում է ՀՌԳ արդյունքների երկար գործընթացին, ապա, իհարկե, սա կարող է երկար գործընթաց դառնալ: Բայց դուք նշեցիք, որ նոր տարածքներ են հայտնվել, սա այնքան նշանակալի արդյունք է Ռուսաստանի համար, սա լուրջ հարց է», - ասել է Պուտինը:

«Եվ ի՞նչ թաքցնենք: Ազովի ծովը դարձավ Ռուսաստանի Դաշնության ներքին ծովը: Սրանք լուրջ բաներ են: Դեռևս Պետրոս Առաջինն էր պայքարում Ազովի ծով հասնելու համար», - ասել է նա:

ՌԴ նախագահն ընդգծել է, որ ամենակարևորը մարդիկ են, որոնք  ապրում են այս տարածքներում։

«Հանրաքվեի արդյունքները ցույց տվեցին, որ մարդիկ ցանկանում են լինել Ռուսաստանի կազմում: Եվ նրանք իրենց համարում են այս աշխարհի մի մասը, այս տարածության, մեր ընդհանուր մշակույթի, ավանդույթների, լեզվի մի մասը: Եվ սա ամենակարևոր արդյունքն է: Եվ նրանք այժմ մեզ հետ են: Եվ սրանք միլիոնավոր մարդիկ են, սա ամենակարևորն է»,- ասել է Պուտինը։

Միաժամանակ նա ընդգծել է, որ Ռուսաստանի Դաշնությունում լրացուցիչ մոբիլիզացիայի մասին խոսելն իմաստ չունի, դրա կարիքը չկա։