կարևոր
1708 դիտում, 2 ամիս առաջ - 2022-12-01 13:24
Սփյուռք

Բագրատունի Այցելեց Նեպիհ Պըրրիի Եւ Զօր. Ապպաս Իպրահիմի

Բագրատունի Այցելեց Նեպիհ Պըրրիի Եւ Զօր. Ապպաս Իպրահիմի

ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունի այցելեց խորհրդարանի նախագահ Նեպիհ Պըրրիի:

Խորհրդակցութիւնները կեդրոնացան հանրապետութեան նախագահի արագ ընտրութեան եւ այս իմաստով խորհրդարանական նիստերու կայացման հարցին վրայ:

Քննարկուեցաւ նաեւ ժողովուրդը յուզող հարցերու կապակցութեամբ օրէնսդրութեան կայացման խնդիրը եւ այս ուղղութեամբ խորհրդարանին մէջ համապատասխան օրինագիծերու վճռահատման անհրաժեշտութիւնը:

Բագրատունի գնահատելով երկխօսութիւն կատարելու Պըրրիի նախաձեռնութիւնը, կարեւոր նկատեց այն, որ նախագահի ընտրութիւնը պէտք է շատ արագ ժամանակամիջոցի մը ընթացքին կատարուի, եւ այս ուղղութեամբ միակ լուծումը կը կայանայ երկխօսութեան ճամբով Լիբանանի ներկայ դժուարին փուլին համապատասխան թեկնածուի մը շուրջ համախոհութեան մէջ:

Նաեւ` Ապպաս Իպրահիմի Մօտ

Երեսփոխան Բագրատունի, ՀՅԴ Լիբանանի Կեդրոնական կոմիտէի անդամ Պարոյր Տէր Ղուկասեանի ընկերակցութեամբ հանդիպում մը ունեցաւ Ընդհանուր ապահովութեան սպասարկութեան ընդհանուր տնօրէն հազարապետ-զօրավար Ապպաս Իպրահիմի հետ:

Քննարկումի նիւթ դարձաւ երկրի ապահովական կացութիւնն ու նախագահական ընտրութիւնը:

Բագրատունի անհրաժեշտ նկատեց, որ զօր. Իպրահիմ ազրպէյճանական եւ թրքական իշխանութիւններուն մօտ կատարէ միջամտութիւն, Պաքուի մէջ գերեվարուած լիբանանցի Վիգէն Իւլճեքեանի անիրաւ բանտարկութեան վերջ տալու եւ զինք ազատ արձակելու առնչութեամբ: