կարևոր
3136 դիտում, 1 տարի առաջ - 2022-10-25 10:36
Քաղաքական

Ընդդիմադիրներին դիրքեր բարձրանալ չեն թողնում, իսկ իշխանականներն այնտեղ սելֆի են անում․ Գեղամ Մանուկյան․ Hraparak.am

Ընդդիմադիրներին դիրքեր բարձրանալ չեն թողնում, իսկ իշխանականներն այնտեղ սելֆի են անում․ Գեղամ Մանուկյան․ Hraparak.am

Գեղամ Մանուկյանի հարցազրույցը Hraparak.am-ին

«Շատերը խորհրդարանական ընդդիմությանը մեղադրում են անգործության, անտարբերության մեջ: Ասում են, թե երկիր ենք կորցնում, իսկ ընդդիմադիրները ոչինչ չեն անում` ձեռքները ծալած նստած են: Ոչ փողոցում են պայքարում, ոչ խորհրդարան են գնում, ոչ էլ մանդատներից են հրաժարվում: Սակայն ընդդիմությունն առարկում է` այդպես չէ: Եւ որպես լուրջ աշխատանքի օրինակ են բերում այն, որ «Հայաստան» խմբակցության անդամ ՀՅԴ-ական Իշխան Սաղաթելյանը ակտիվ հանդիպումներ է ունենում Հայաստանում հավատարմագրված օտարերկրյա դեսպանների հետ: Մասնավորապես` Սաղաթելյանը վերջին օրերին հանդիպել է Հայաստանում Ռուսաստանի, Իրանի և Չինաստանի դեսպանների հետ։ Չինաստանի դեսպանի հետ հանդիպմանը մասնակցել է նաև պատգամավոր Գեղամ Մանուկյանը: Մենք զրուցել ենք նրա հետ:

- Պարոն Մանուկյան, Հայաստանում Չինաստանի դեսպան Ֆան Յոնի հետ ինչու էիք հանդիպել, ի՞նչ քննարկվեց այդ հանդիպման ժամանակ:

- Նման հանդիպումներ իրականում շատ հաճախ ենք ունենում տարբեր երկրների դեսպանների հետ, պարզապես որոշների մասին տեղեկություն տարածվում է, որոշների մասին` ոչ: Չինաստանի դեսպանի հետ սա առաջին հանդիպումը չէր: Իշխան Սաղաթելյանը հաճախ է հանդիպում նրա հետ: Մտքերի փոխանակում եղավ: Տարածաշրջանում լարվածության մասին խոսվեց, հայ-չինական կապերի և այլ հարցերի մասին:

- Ո՞վ էր նախաձեռնել հանդիպումը:

- Մենք առաջարկել ենք, որ եթե հարմար լինի դեսպանին հանդիպենք, դեսպանատնից էլ շատ արագ արձագանքել էին և հանդիպումը կայացավ: Պրոտոկոլային խնդիր չէ, թե ով է նախաձեռնել այն: Այս անգամ Իշխան Սաղաթելյանն էր նախաձեռնել հանդիպումը:

- Առաջիկայում այլ հանդիպումներ նախատեսվո՞ւմ են:

- Այո, վստահաբար կլինեն, թե պատգամավորների մասնակցությամբ, թե առանց նրանց:

- Շատերը վերջին շրջանում մեղադրում են ձեզ չեզոքության, անգործության մեջ: Ասում են` երկիր ենք կորցնում, ընդդիմության ձայնը դուրս չի գալիս....

- Միայն կույրն ու խուլը կարող են ընդդիմության ձայնը չլսել: Երկու օր առաջ պատգամավորական մեծ խմբով գնացել էինք Տավուշի մարզ: Այցելեցինք` Բերդ, Չինարի, Այգեձոր, Արծվաբերդ, Իջևան: Հանդիպումներ եղան բնակիչների հետ:

- Իսկ դիրքեր բարձրացա՞ք:

- Չէ, թույլ չտվեցին: Մի քանի անգամ դիմել ենք Պաշտպանության նախարարություն` դիրքեր գնալու համար, սակայն մերժվել ենք: Ուստի այցելեցինք միայն բնակավայրեր:

- Ի՞նչ հիմքով են մերժել:

- Չկա հիմք: Ես որպես ԱԺ Պաշտպանության հանձնաժողովի անդամ վստահաբար ասում եմ` ոչ մի հիմք չկա: Օրերս էլ նախարար Սուրեն Պապիկյանին էինք դիմել եռամսյա հավաքների տեղակայման վայրեր այցելելու համար, սակայն ստացել ենք մերժում, փոխարենն իշխանական պատգամավորներն այնտեղ սելֆիներ են անում...»։