Ադրբեջանն Իրանին սպառնացել է հրթիռային հարվածներով

Իրանի նախագահ Ռաիսիի հայտարարությունները՝ Ադրբեջանի նախագահի հետ առ այն, որ իրենց համար անընդունելի է, որեւէ այլ օտարերկրյա ռազմական ներկայությունը տարածաշրջանում հիստերիա է առաջացրել Ադրբեջանում։

Ադրբեջանցի պատգամավոր Ռասիմ Մուսաբեկովը Իրանի նախագահի այս հայտարարությունը որակել է անտեղի, իսկ Իրանի նախաձեռնած զորավարժությունները՝ պրովոկացիա։

«Իսլամական հեղափոխության պահապանների կորպուսը Ադրբեջանի հետ սահմանին կազմակերպում է պրովոկացիոն զորավարժություն, իսկ ԻԻՀ նախագահ Էբրահիմ Ռաիսին Աստանայում Ադրբեջանի նախագահի հետ զրույցում հայտնում է ոչ տեղին զգուշացումներ՝ տարածաշրջանում օտարեկրյա ռազմական ներկայության անթույլատրելիության մասին։ Միաժամանակ, իրանական «մոլակրատիան», ամենայն հավանականությամբ, «օտարերկրյա» չի համարում Հայաստանում ռուս զինվորականներին և ներողամտորեն է վերաբերվում հայ-ադրբեջանական սահմանին ինչ-որ եվրոպացի դիտորդներ ներգրավելու Հայաստանի մտադրությանը»,- ֆեյսբուքում գրել է ադրբեջանցի պատգամավորը։

Ավելին, նա հայտարարել է, թե Ադրբեջանում վաղուց են ծանոթ իրանական «խեղաթյուրված» աշխարհընկալմանն ու քաղաքականությանը, ու բավական հանդուգն ձեւակերպմամբ խորհուրդ տվել Իրանին՝ ձեռնպահ մնալ Ադրբեջանի հետ հարաբերություններում ճնշումներից։

«Անհրաժեշտ է ճիշտ գնահատել ռիսկերը, քանի որ ի պատասխան հարվածի տակ կհայտնվեն Թուրքիայի և Պակիստանի հետ իրենց սահմանները, հազարավոր հրթիռներ ու ռումբեր Իսրայելից և Սաուդյան Արաբիայից, որոնք վաղուց պատրվակ են փնտրում Իրանի հրթիռային և միջուկային ենթակառուցվածքները ոչնչացնելու համար, կթափվեն իրենց գլխին»,- հայտարարել է ադրբեջանցի պատգամավորը։