Թուրքիան ցանկացած պահի կարող է գործողություններ սկսել Սիրիայում

Թուրքական բանակը ցանկացած պահի կարող է նոր ռազմական գործողություն սկսել Սիրիայի հյուսիսում։ Երկրի զինված ուժերը գտնվում են մշտական պատրաստության վիճակում։ Գործողություն իրականացնելու որոշումը կայացնում է քաղաքական ղեկավարությունը։ Այս մասին երկուշաբթի հայտնել է Թուրքիայի պաշտպանության նախարար Հուլուսի Աքարը։

«Թուրքական բանակն ու ոստիկանությունն այդ շրջաններում պատրաստ են նոր գործողությունների»,- ասել է նախարարը։

Նրա խոսքով՝ գործողությունների մեկնարկի ժամանակը կախված է բազմաթիվ գործոններից, այդ թվում՝ պատրաստության աստիճանից, տեղանքի պայմաններից, եղանակից։ «Եվ, վերջապես՝ քաղաքական կամքից»,- հավելել է Թուրքիայի պաշտպանության նախարարության ղեկավարը։

Հնարավոր է, որ Սիրիայում գործողություն իրականացնելու մասին որոշումն ընդունվի երկուշաբթի նախատեսված՝ Ռուսաստանի և Թուրքիայի նախագահների հեռախոսազրույցից հետո․ Էրդողանի ու Պուտինի բանակցությունները վճռորոշ են լինելու։