Հայրենիքը կորցնելու վրա աչք չես փակի, չենք կարող Արցախի մեր հայրենակիցներին, թողնել բախտի քմահաճույքին․ Ա․ Ջուլֆալակյան

Եթե կան մարդիկ, որոնք կարող են աչք փակել այս իշխանությունների օրոք երկրում ստեղծված սոցիալական դժվարությունների վրա, ապա հայրենիքը կորցնելու վրա աչք փակել չի լինի, մեր հայրենիքի մի հատվածը՝ Արցախը և Հայաստանից որոշ տարածքներ զիջվել են թշնամուն, այս մասին Ֆրանսիայի հրապարակում ասաց ըմբշամարտիկ, ԱԺ նախկին պատգամավոր Արսեն Ջուլֆալակյանը։

«Երբեք չեմ ուզի համաձայնել ու պատկերացնել, որ հայը պատրաստ է ցանկացած պետության հետ հարաբերություններ հաստատել՝ չհասնելով պատմական արդարության։ Իսկ ո՞րն է պատմական արդարությունը տվյալ դեպքում Թուրքիայի հետ՝ առնվազն հասնել նրան, որ Թուրքիան ընդունի, որ ժամանակին ցեղասպանություն է գործել և ներողություն խնդրի»,– ասել է նա՝ հարցադրում անելով, թե արդյոք մենք մոռացել ենք մեր նախնիներին, մեր գենը։

«Մի՞թե մենք ձուլվել ենք այս տարիների ընթացքում, միգուցե նրանցից ոմանք ձուլվել են, ես չգիտեմ։ Բայց աննորմալ է փողով վաճառել արյունդ, պատմությունդ։ Չի լինի ոչ մի դեպքում արդար լուծում այս հարցին, քանի չկա հանցագործության հեղինակի կողմից առնվազն ներողություն»,– ընդգծել է նա։

Խոսելով Հայաստանի մյուս հարևանի մասին՝ նախկին պատգամավորն ասել է, որ քանի դեռ Ադրբեջանը չի ընդունել իր հանցագործությունները, չի համաձայնել, որ Արցախում, գոնե 4500 ք/կմ տարածքի վրա հայը պետք է ապրի անկախ, ինքնուրույն, չի կարող լինել արդար հանգուցալուծում։

«Հարյուր հազարից ավելի մեր հայրենակիցներն այնտեղ են ապրում, մենք ինչպե՞ս կարող ենք հաշտվել այն մտքի հետ, որ պետք է ուղղակի լքենենք մեր հայրենակիցներին, թողնենք բախտի քմահաճույքին և ուղղակի ապրենք այսօր՝ այս տարածքով, վաղն էլ կուզեն այս տարածքից մի հատված, միգուցե դա էլ կլքենք և այսպես շարունակ, չէ՞ որ թշնամին պարզ ասում է, որ խնդիրը միայն Արցախը չէ, Սյունիքի մասին է խոսում, Սևանա լճի մասին է խոսում և անամոթությունն այն աստիճանի է հասել, որ Երևանի մասին է խոսում»,– ասել է Արսեն Ջուլֆալակյանը։