Սարյանի կտավը` բախտի քմահաճույքին

Հունիսի 7-ին Լոնդոնում կանցկացվի «Ռուսական արվեստի աճուրդը», որի ընթացքում վաճառքի է հանվելու նաեւ Մարտիրոս Սարյանի «Կովկասյան քաղաքի փողոց» կտավը: Աճուրդին մասնակցելու համար Լոնդոն է մեկնել նաեւ Մարտիրոս Սարյանի տուն-թանգարանի տնօրեն Ռուզան Սարյանը:

Նա մեկ ամիս առաջ է իմացել, որ Սարյանի կտավը շուտով աճուրդի է հանվելու, այդ կապակցությամբ հանդես է եկել հայտարարությամբ, որ մեծահարուստ հայերից մեկը գոնե գնի կտավը եւ այն նվիրաբերի թանգարանին, դիմել է մշակույթի նախարարությանը, սակայն «ձայն բարբառոյ յանապատի»...

Սարյանի տուն-թանգարանի գիտաշխատող Բելլա Իսահակյանը «Երկիր»-ի հետ զրույցում նշեց, որ իրենք դեռեւս հույս ունեն, որ որեւէ հայ բարերար կգնի Սարյանի ստեղծագործությունըը եւ կնվիրի տուն-թանգարանին. «Մենք հասկանում ենք, որ մշակույթի նախարարությունն այդքան գումար չէր կարող տրամադրել»:

Ի դեպ, Սարյանի կտավը գնահատվել է 200-300 հազար եվրո: