Ճապոնիան միջուկային ռեակտորներ կօգտագործի ռուսական էներգիայից կախվածությունը նվազեցնելու համար

Ճապոնիան միջուկային ռեակտորներ կօգտագործի՝ ռուսական էներգիայից երկրի եւ այլ երկրների կախվածությունը նվազեցնելու համար։ Այս մասին հայտարարել է Ճապոնիայի վարչապետ Ֆումիո Կիսիդան, փոխանցում է Reuters-ը։

Ճապոնիան ավելի մեծ կախվածություն է ձեռք բերել ռուսական գազից այն բանից հետո, երբ 2011 թվականին Ֆուկուսիմայի վթարի պատճառով կանգնեցվեցին միջուկային ռեակտորները։

Սակայն հուլիսին կայանալիք ընտրություններից եւ էներգակիրների գների աճից առաջ, որոնք կրճատում են ընտրողների բյուջեները, Կիսիդան հայտարարել է, որ միջուկային էներգետիկան երկրի ապագա էներգետիկ քաղաքականության մի մասը կդառնա:

Նրա խոսքով՝ Ճապոնիան կվերացնի «սեփական էներգետիկ ինքնաբավության խոցելիությունը»՝ ընդլայնելով այն տեղերը, որտեղ էներգիա է գնում, խթանելով էներգիայի վերականգնվող աղբյուրները եւ օգտագործելով միջուկային էներգիան՝ գեներացիայի իր աղբյուրները դիվերսիֆիկացնելու համար:

«Մենք կօգտագործենք միջուկային ռեակտորներ՝ անվտանգության երաշխիքներով, որպեսզի մեր ներդրումն ունենանք ռուսական էներգիայից կախվածությունը նվազեցնելու գործում»,- ասել է Կիսիդան։

«Ընդամենը մեկ գործող միջուկային ռեակտորի վերագործարկումը կունենա նույն ազդեցությունը, ինչ տարեկան 1 միլիոն տոննա ՀԲԳ-ի (հեղուկ բնական գազ) մատակարարումը համաշխարհային շուկա»:

2011 թվականի մարտի երկրաշարժից եւ ցունամիից ավելի քան մեկ տասնամյակ անց, որոնք առաջ բերեցին Չեռնոբիլից ի վեր վատագույն միջուկային ճգնաժամը, միջուկային էներգիան բարդ խնդիր է մնում Ճապոնիայում, որտեղ ներկայումս աշխատում է նրա 30 ից ավելի էլեկտրակայաններից միայն մի քանիսը:

Կիսիդայի խոսքով՝ հաջորդ տասնամյակում կներդրվի 150 տրիլիոն իեն (1,16 տրլն դոլար)՝ մինչեւ 2050 թվականը ածխածնի չեզոքության նպատակներին հասնելու համար եւ մինչեւ 2030 թվականը ջերմոցային գազերի արտանետումները 46 տոկոսով նվազեցնելու համար: