ԵՄ-ն քննարկելու է միջուկային էներգիայից հրաժարվելու հարցը

Եվրամիության միջուկային էներգիայի գծով մասնագետները մարտի 16-ին տեղի ունենալիք նիստում պետք է քննարկեն մոտ ապագայում ատոմային էներգիայից հրաժարվելու հնարավորությունը. հայտարարել է ԵՄ էներգետիկ հարցերով հանձնակատար Գյունտեր Էթինգերը:

Նա խորհրդակցություն է հրավիրել` Ճապոնիայում միջուկային ճգնաժամի լույսի ներքո քննարկելու ԵՄ երկրների համակարգված քաղաքականությունն այդ հարցում:

«Մենք` Եվրոպան, պետք է քննարկենք այն հարցը, թե կարո՞ղ ենք մոտ ապագայում ապահովել մեր պահանջներն առանց ատոմային էներգիայի»,- ելույթ ունենալով  գերմանական ARD հեռուստաալիքով` ասել է Էթինգերը:

Մարտի 14-ին Գերմանիայի կառավարությունն արդեն որոշել է չերկարացնել իր ատոմակայանների շահագործման ժամկետը: