Ռուսական զորքերը սկսել են Դոնբասի համար ճակատամարտը. Զելենսկի

Ուկրաինայի նախագահ Վլադիմիր Զելենսկին նոր ուղերձում հայտարարել է, որ «ռուս զավթիչները սկսել են Դոնբասի համար մարտը» և իրենց բանակի զգալի մասը կենտրոնացրել են՝ Ուկրաինայի արևելքում հարձակման համար։

Պետության ղեկավարի խոսքով՝ արևելքում և հարավում ռուսական բանակը վերջին շրջանում փորձում է հարձակվել «մի փոքր ավելի մտածված, քան նախկինում» և թույլ տեղ է փնտրում Ուկրաինայի պաշտպանության գծում։ Նա նշել է, որ ռուս գեներալները, հավանաբար, «արդեն այնքան շատ ռուս զինվոր են սպանել, որ պետք է զգույշ լինեն, այլապես հարձակվող չի մնա»։

«Ինչքան էլ ռուս զինվորներ ուղարկվեն այնտեղ (Դոնբաս), մենք կկռվենք և կպաշտպանվենք։ Մենք դա կանենք ամեն օր։ Մենք ուկրաինական ոչ մի բան չենք հանձնի, բայց նաև չենք վերցնի ուրիշինը»,- ընդգծել է Զելենսկին։