Դոնբասի համար ճակատամարտը վճռորոշ է, և այն արդեն ընթանում է. Ուկրաինայի ՊՆ

Դոնբասի համար պայքարը շարունակվում է արդեն մի քանի օր։ Ռուսական զորքերն ակտիվացրել են հարձակողական գործողությունները Լուգանսկի և Դոնեցկի շրջաններում․ «РБК-Украина»-ին տված հարցազրույցում ասել է Ուկրաինայի պաշտպանության նախարարության խոսնակ, գնդապետ Ալեքսանդր Մոտուզյանիկը։

Նրա խոսքով՝ վերջին մի քանի օրվա ընթացքում ռուսական զորքերը զգալիորեն արագացրել են հարձակողական գործողությունները Արևելյան օպերատիվ գոտում և ավելացրել հրթիռային ու հրետանային հարձակումների թիվը շփման գծի գրեթե ողջ երկայնքով։

«Այժմ կարելի է ասել, որ այս վճռական ճակատամարտն արդեն սկսվել է»,- ասել է Մոտուզյանիկը։

Նրա կարծիքով՝ ռուսաստանցի զինվորականների լայնածավալ հարձակումը Ուկրաինայի արևելքում վաղ թե ուշ պետք է տեղի ունենար. ուկրաինական քաղաքներն ու գյուղերը այս տարածքում մեծ ու փոքր ամրոցներ են։

«Նրանք համարձակորեն պահում են պաշտպանությունը և խոչընդոտում թշնամուն։ Նրանք թույլ չեն տալիս իրագործել մեր բոլոր տարածքները գրավելու՝ նրա ծրագրերը։ Ուստի Դոնբասի ճակատամարտը, առանց չափազանցության, վճռորոշ ճակատամարտն է Ուկրաինայի համար»,- ընդգծել է ՊՆ խոսնակը։