Գոռավանի խոհարար գյուղապետը համայնքապետարանի շենքը վերածել է «ՔՊ-անոց-սրճարանի»

Վեդի խոշորացված համայնքի Գոռավան բնակավայրում Yerkir.am-ի լրագրողը արձանագրել է, որ գյուղապետ Դավիթ Ավետիսյանը կիրակի օրով բացել է համայնքապետարանի շենքը՝ այն վերածելով ՔՊ-ի շտաբի:

«Հանցանքի վայրում» գյուղապետից հետաքրքրվեցինք՝ ինչո՞ւ է բացել դռները, ովքե՞ր են ներսում, ինչո՞ւ է ՔՊ-ի թեկնածուն ելումուտ անում:

«Կոֆե ենք դնում, ջուր ենք տալիս ընտրատեղամասի աշխատողներին», - կծկտուր ասաց նա՝ ագրեսիվ վարքով փորձելով հեռացնել լրագրողին համայնքապետարանի շենքի առջեւից:

Մեր ունեցած տեղեկություններով` Գոռավանի գյուղապետը նախկինում խոհարար է եղել, իսկ այժմ՝ ՔՊ-ից քաղաքական պաշտոն ստանալուց հետո, համատեղում է գյուղապետի աշխատանքը խոհարարության հետ՝ աշխատավայրը վերածելով խոհանոցի:

Մինչ մենք փորձում էինք պարզաբանում ստանալ, համայնքապետարանի շենքից դուրս եկավ մի քաղաքացի, որը, ավելի ուշ պարզեցինք, ՔՊ-ական է:

Ի դեպ, գյուղապետը թույլ չտվեց լրագրողին մտնել համայնքապետարանի շենք:

Լիանա Սարգսյան