Էրդողանը Պուտինին հարթակ է առաջարկել Զելենսկիի հետ հանդիպման համար

Թուրքիայի նախագահ Ռեջեփ Թայիփ Էրդողանը Ռուսաստանի առաջնորդ Վլադիմիր Պուտինի հետ բանակցությունների ընթացքում ևս մեկ անգամ առաջարկել է Անկարայում կամ Ստամբուլում հանդիպում կազմակերպել Ուկրաինայի նախագահ Վլադիմիր Զելենսկիի հետ։ Այս մասին հինգշաբթի հայտարարել է Թուրքիայի նախագահի վարչակազմը Պուտինի հետ Էրդողանի հեռախոսազրույցից հետո։

«Թուրքիայի նախագահը նշել է, որ որոշ հարցերի շուրջ կոնսենսուսի հասնելու համար կարող է անհրաժեշտ լինել առաջնորդների մակարդակով հանդիպում։ Նշելով դա՝ Էրդողանը կրկնել է Ռուսաստանի և Ուկրաինայի նախագահներին Ստամբուլում կամ Անկարայում հյուրընկալելու՝ իր առաջարկը»,– ասվում է զեկույցում:

Էրդողանը հայտնել է իր «անկեղծ ցանկությունը, որ Ռուսաստանի և Ուկրաինայի միջև  բանակցությունները դրական արդյունքների բերեն»։ Նրա խոսքով՝ «մշտական հրադադարը ճանապարհ կհարթի երկարաժամկետ կարգավորման համար»։ Թուրքիայի նախագահն ընդգծել է «մարդասիրական իրավիճակի մոնիթորինգի և երկու ուղղություններով մարդասիրական միջանցքների արդյունավետ ու անխափան գործունեության մշտադիտարկումը»։