Ըստ թուրքական ԶԼՄ–ների՝ Էրդողանը Պուտինին առաջարկել է ստեղծել համատեղ աշխատանքային խումբ. Կրեմլը չի մեկնաբանել տեղեկությունը

Ռուսաստանը բոլոր ջանքերը գործադրում է Լեռնային Ղարաբաղի հակամարտության քաղաքական-դիվանագիտական լուծման համար: Այս մասին երկուշաբթի լրագրողներին հայտնել է ՌԴ նախագահի մամուլի քարտուղար Դմիտրի Պեսկովը:

«Ռուսական կողմը, ինչպես նախկինում, ջանք չի խնայում Լեռնային Ղարաբաղի հակամարտությունը քաղաքական և դիվանագիտական ճանապարհով լուծելու համար»,- ասել է Կրեմլի խոսնակը՝ պատասխանելով հարցին, թե արդյո՞ք այս հակամարտությունը կարող է ռազմական լուծում ունենալ:

Ռուսաստանի նախագահի մամուլի քարտուղարը չի մեկնաբանել թուրքական ԶԼՄ–ների այն տեղեկատվությունը, ըստ որի՝ նոյեմբերի 7-ին կայացած հեռախոսազրույցում Թուրքիայի նախագահ Ռեջեփ Թայիփ Էրդողանը Ռուսաստանի ղեկավար Վլադիմիր Պուտինին առաջարկել է ստեղծել համատեղ աշխատանքային խումբ` Լեռնային Ղարաբաղում իրավիճակը կարգավորելու համար: Պեսկովի խոսքով՝ Կրեմլի մամուլի ծառայությունը նոյեմբերի 7-ին արդեն զեկուցել է Պուտինի ու Էրդողանի քննարկած թեմաների մասին: «Ես այս հաղորդագրությանն ավելացնելու բան չունեմ: Ղարաբաղի հարցն իսկապես շոշափվել է»,- ասել է Պեսկովը: