ՏԵՍԱՆՅՈՒԹ․ «Տենց ա, ես էլ՝ Հռոմի պապն եմ»․ Ավանի ոստիկանություն բողոք են ներկայացրել քաղաքապետարանի դեմ

Երեւանի Ավան վարչական շրջանի Աճառյան փողոցի 18 շենքի հարակից տարածքում  քաղաքապետարանը մետաղական կոնստրուկցիաներով կառուցված երկու ավտոտնակ է հողին հավասարեցրել, ջարդել-ավիրել ներսում եղած գույքը՝ թույլ չտալով ավտոտնակների տերերին՝ դատարկել այնտեղ ամբարված գույքը, տեխնիկան, շինանյութը, ավտոպահեստամասերը եւ այլ թանկարժեք իրեր:

Yerkir.am-ի նկարահանող խումբը դեպքի վայրում է եղել եւ նկարահանել բողոքող քաղաքացիներին, որոնք ոստիկանություն են դիմել՝ պատճառված վնասի փոխհատուցումը ստանալու համար:

Տուժած քաղաքացիներից Էդիկ Մուրադյանը Yerkir.am-ի հետ զրույցում ասաց, որ ավտոտնակը կառուցելուց հետո դիմել է քաղաքապետարան՝ օրինականացնելու համար: Առանց քաղաքացուն իրազեկելու՝ պատկան մարմինները ոչ աշխատանքային ժամին՝ գիշերով, եկել եւ հողին են հավասարեցրել միաժամանակ երկու ավտոտնակ:

«Շենքի հարակից տարածքում 2005 թ.-ից ունեցել եմ ավտոտնակ, որի համար բարեխղճորեն վճարել եմ: 2018 թ.-ին շարքից դուրս եկած հին ավտոտնակի տեղը մետաղական կոնստրուկցիաներով ավտոտնակ էի ժամանակավորապես սարքել, ապա քաղաքապետարան՝ դիմում ներկայացրել՝ օրինականացնելու համար: Մինչ օրս դիմումը, ցույց  է տալիս, ընթացքի մեջ է: Քանդելու ժամանակ մենք ոչ մի որոշում չենք ունեցել, մեզ քաղաքապետարանը չի պատասխանել:

2022 թ. մարտի 10-ին աշխատանքից վերադառնում էի, զանգահարեցին, ասացին՝ ձեր ավտոտնակը քանդում են: Իմ ավտոտնակի կողքին նույն շենքից մեկ այլ բնակիչ ունի ավտոտնակ: Մինչեւ մոտեցել եմ՝ քաղաքապետարանից, թե՝ Ավանի թաղապետարանից, ոստիկանության աշխատակիցների հետ ամբողջ բակը շրջափակվել էին: Մի կերպ եմ մոտեցել, պահանջել եմ որոշում, հիմք, թե ինչի հիման վրա են քանդում: Ոչ մի հիմք չի եղել»,- պատմեց քաղաքացին:

Մանրամասն՝ տեսանյութում

Լիանա Սարգսյան