Մեծ Բրիտանիան Ուկրաինա է ուղարկում հատուկ նշանակության ստորաբաժանումներ

Մեծ Բրիտանիան ավելի քան 100 էլիտար հատուկջոկատային է ուղարկել Ուկրաինա՝ ծառայելու որպես ռազմական խորհրդատուներ և ուկրաինական հատուկ ջոկատայինններ պատրաստողներ:

Ըստ Mirror-ի բրիտանական հրատարակության՝ պաշտոնական Լոնդոնը որոշել է էլիտար հատուկջոկատայիններ ուղարկել Ուկրաինա ռուսական պոտենցիալ ներխուժման «անմիջական վտանգի» պատճառով։

Պարբերականի համաձայն՝ Ռուսաստանից եկող սպառնալիքը խիստ անհանգստացնում է ՆԱՏՕ-ի երկրներին։

Իրավիճակը քննարկել են Մեծ Բրիտանիայի վարչապետ Բորիս Ջոնսոնը և Ֆրանսիայի նախագահ Էմանուել Մակրոնը։

Բանակցությունների ընթացքում կողմերը որոշել են, որ Դաշինքի արևելյան թևի երկրները պետք է լիովին պաշտպանված լինեն «ռուսական վնասակար գործողություններից»։ Դրա պատճառով Ուկրաինա է ուղարկվել բրիտանական էլիտար հատուկ նշանակության ջոկատների ավելի քան 100 մարտիկ։ 

«Բրիտանական հատուկջոկատայիններ են ուղարկվել տարածաշրջան՝ օգնելու և խորհրդակցելու ուկրաինացի զինվորականների հետ։ Նրանք ունեն հմտությունների լայն շրջանակ, որոնք, անկասկած, օգտակար կլինեն Ուկրաինայի զինված ուժերին»,- նշում է պարբերականը։