ԱՄՆ-ը 3000 զինծառայող կուղարկի Լեհաստան, Ռումինիա եւ Գերմանիա «ՆԱՏՕ-ի պաշտպանությունն ամրապնդելու համար»

ԱՄՆ-ը 3000 զինծառայող կուղարկի Լեհաստան, Ռումինիա եւ Գերմանիա «Եվրոպայում ՆԱՏՕ-ի պաշտպանությունն ամրապնդելու համար՝ ուժեղացնելով դաշինքի արձագանքը Ուկրաինա ռուսական հնարավոր ներխուժմանը»: Այս մասին հայտարարել Է Պենտագոնի պաշտոնական ներկայացուցիչ Ջոն Քիրբին, փոխանցում է AP-ն։

Մասնավորապես, Հյուսիսային Կարոլինա նահանգի Ֆորտ Բրեգից 2000 զինծառայող կուղարկվի Լեհաստան եւ Գերմանիա, իսկ հեծելազորի մոտ 1000 զինծառայող՝ Գերմանիայից Ռումինիա։

«Նախագահ Բայդենը հստակ հասկացրել է, որ Միացյալ Նահանգները կպատասխանի Եվրոպայի անվտանգության և կայունության աճող սպառնալիքին։ Մեր հավատարմությունը ՆԱՏՕ - ի 5-րդ հոդվածին եւ հավաքական պաշտպանությանը մնում է անսասան», - ասել Է Քիրբին ՝ հավելելով, որ այդ քայլերը «մշտական բնույթ չեն կրում», եւ «նախատեսված են անվտանգության հետ կապված ընթացիկ իրավիճակին արձագանքելու համար»: «Ավելին, այդ ուժերը չեն պատրաստվում պատերազմել Ուկրաինայում», - նշել է նա։