Փաշինյանը քաղաքական արժանապատվություն է ցուցաբերում Ռուսաստանի հրահանգով. Նաիրի Հոխիկյան

Ամիսներ առաջ հավաստիացնում էին, թե Գորիս-Կապան ավտոճանապարհի Որոտանի հատվածում ադրբեջանական  «մաքսային» և «սահմանային» հսկողությունը թույլատրվել է, որպեսզի չլինի «միջանցքային տրամաբանություն»։ Սակայն այսօր ականատես ենք լինում, թե ինչպես է Բաքվի բռնապետը սպառնում, որ  սահմանային հսկողության կետ կտեղադրի «Լաչինի միջանցում», եթե Հայաստանը «Զանգեզուրի միջանցքը» չտրամադրի իրեն առանց մաքսային հսկողության կետի։ Ըստ լրագրող, մեդիափորձագետ Նաիրի Հոխիկյանի՝ եթե Ադրբեջանը «մաքսային» հսկողության կետ տեղադրի «Լաչինի միջանցքում», ապա դա կնշանակի պատերազմ Ռուսաստանի դեմ, որը, կվերածվի ռազմական էսկալացիայի։

Խնդիրն այն է, որ  «Լաչինի միջանցքն» ունի հումանիտար բնույթ, որն արցախահայերի՝ փաստացի ՄԻԱԿ «սննդարար» զարկերակն է, և չի կարող վերահսկվել Ադրբեջանի կողմից, մանավանդ՝ երբ կա անհաղթահարելի թշնամական պատնեշ հայերի և ադրբեջանցիների միջև: Նաիրի Հոխիկյանը նշեց, որ այսօր մենք գործ ունենք թուրք-ադրբեջանական հերթական սադրանքի հետ։

«Նրանք փորձում են, «Լաչինի միջանցք» խաղարկելով, ստանալ միջանցք  Սյունիքի մարզում, որը  չի ստացվի»,- ասաց նա։

Անդրադառնալով Փաշինյանի՝ կոմունիկացիաների բացման հարցը փակուղի մտցնելու փորձի համար Ալիևին ներկայացված մեղադրանքներին, Նաիրի Հոխիկյանը նշեց, որ Փաշինյանի՝ նման հայտարարությունները խոսում են այնա մասին, որ, ամենայն հավանականությամբ, Ռուսաստանից է ստացել նման հրահանգ, ըստ որի՝ մի փոքր էլ քաղաքական արժանապատվություն է պետք, ի վերջո, ցուցաբերել և արձագանքել Ադրբեջանին։

«Թուրքիան և Ադրբեջանն այնքան են ցինիկացել, որ այժմ իրենց ամեն ինչ թույլ են տալիս. հակադրում են «Լաչինի միջանցքը» և այլն։ Չեմ բացառում, որ առաջիկայում հարաբերությունների սրման առաջ կկանգնենք»,- փաստեց Ն.Հոխիկյանը։

Փորձագետը եզրափակեց, որ ներկայիս իշխանությունները թշնամու հետ շարունակում են գնալ գործարքի, որը շատ լուրջ հետևանքներ կունենա Հայաստանի համար։                                     

                                                                                   Լենա Կարապետյան