Պուտինը Էրդողանին պատմել է Փաշինյան-Ալիև հանդիպման ու հիշեցրել է Դոնբասի դեմ կիրառվող «Բայրաքթար»-ների մասին

Ռուսաստանի նախագահ Վլադիմիր Պուտինը հեռախոսազրույցի ընթացքում Թուրքիայի նախագահ Ռեջեփ Թայիփ Էրդողանին հայտնել է Ռուսաստանի, Ադրբեջանի և Հայաստանի ղեկավարների վերջին եռակողմ հանդիպման արդյունքները։ Այս մասին հայտնում է Կրեմլի մամուլի ծառայությունը։

Հաղորդագրության մեջ ասվում է, որ Պուտինը թուրք գործընկերոջը տեղեկացրել է նոյեմբերի 26-ին Սոչիում կայացած` երեք երկրների ղեկավարների հանդիպման հիմնական արդյունքների մասին։

Պուտինն ու Էրդողանը երկկողմ օրակարգի շրջանակներում քննարկել են նաև էներգետիկայի և գյուղատնտեսության ոլորտին առնչվող հարցեր։ Կողմերը պայմանավորվել են սկսել ամենաբարձր մակարդակի Համագործակցության խորհրդի հաջորդ նիստի նախապատրաստական աշխատանքները։ Ենթադրվում է, որ այն կարող է անցկացվել 2022 թվականի սկզբին։

Ռուսաստանի Դաշնության նախագահը Թուրքիայի ղեկավարին ասել է, որ Ուկրաինան շարունակում է իր ապակառուցողական գիծը, որն ուղղված է Մինսկյան պայմանավորվածությունների խաթարմանը։ Դա է վկայում ուկրաինացի զինվորականների սադրիչ գործունեությունը հակամարտության գոտում, այդ թվում՝ «Բայրաքթար» անօդաչու թռչող սարքի կիրառումը։

«Շեշտվել է, որ Կիևը պետք է հրաժարվի Դոնբասի վրա ուժային ազդեցության փորձերից», - ասվում է մամուլի ծառայությունում:

Պուտինի եւ Էրդողանի բանակցությունները կայացել են թուրքական կողմի նախաձեռնությամբ։