Մենք ապահովելու ենք տարածաշրջանի երկրների և մեր եղբայրների անվտանգությունը. իրանական բանակի հրամանատար

Իրանի զինված ուժերի հրամանատար Աբդոլրահիմ Մուսավին երկիմաստ նախազգուշացում է արել իր հյուսիսային հարեւան Ադրբեջանին, որը չի հրաժարվում Իրանի սահմանի մոտակայքում` Հայաստանով միջանցք ունենալու մտքից. գրում է իրանական «Ազերիհա» թերթը։ 

«Նրանք, ովքեր հրավիրում են օտարերկրացիներին՝ իրենց անվտանգությունն ապահովելու համար, պետք է իմանան, որ այս բռնատիրական և էքսպանսիոնիստ երկրները փորձում են պաշտպանել իրենց շահերը։ Մեր անցյալը ցույց է տվել, որ մենք ագրեսոր չենք։ Մեր բոլոր զորավարժությունները, որ մենք անցկացնում ենք, ուղղված են երկրի պաշտպանությանը։ Բայց թող մեր թշնամիները չսխալվեն։ Նրանք պետք է հասկանան, որ եթե սպառնում են մեր շահերին, մեր պատասխանը չի սահմանափակվի սահմաններով։ Եթե նրանք սպառնում են մեր շահերին, մենք կսպառնանք նրանց շահերին, որտեղ էլ որ նրանք լինեն»,- ասել է բրիգադային գեներալ Մուսավին։

Նա ընդգծել է, որ Իրանը կապահովի տարածաշրջանի երկրների ու իր եղբայրների անվտանգությունը, կպաշտպանի իրեն ու իր ժողովրդին։