Թուրքիան հնարավոր է մեծացնի զորքերի ներկայությունը Լիբիայում

Թուրքիայի նախագահ Ռեջեփ Թայիփ Էրդողանը և Լիբիայի ազգային համաձայնության կառավարության ղեկավար Աբդուլհամիդ Դբեյբեն քննարկել են հյուսիսաֆրիկյան երկրում տեղակայված թուրքական զորքի թվի ավելացման հնարավորությունը. հայտնում է Asharq al-Aawsat-ը։

Երկու առաջնորդները պայմանավորվել են, որ ԼԱՀԿ-ն պաշտոնապես կպահանջի Տրիպոլիում խորհրդատվական և ռազմական անձնակազմի ավելացում, և որ Լիբիայի անվտանգության անձնակազմի նոր խումբը վերապատրաստում կանցնի Թուրքիայում։

Միաժամանակ, Էրդողանը հայտարարել է, որ Թուրքիան կշարունակի աջակցել ԼԱՀԿ-ին բոլոր մակարդակներում։

Պարբերականը նշում է, որ Թուրքիան կարող է ցանկանալ մեծացնել իր ռազմական ներկայությունը՝ կապված ընտրություններից առաջ Լիբիայից օտարերկրյա զորքերի և վարձկանների դուրսբերման աճող պահանջի հետ։

Երկուշաբթի՝ ավելի վաղ, Էրդողանը հայտարարել էր, որ Թուրքիան չի մասնակցի Լիբիայի հարցով համաժողովին, որը կազմակերպվելու է Փարիզում։ Թուրքիայի նախագահը նաև նշել էր, որ Թուրքիայի ներկայությունը նախորդ կառավարության հետ պայմանավորվածության մաս է: