Լավ լուրն այն է, որ շուկա չկա, որ քանդվի. Նիկոլ Փաշինյան

Պետական մասնաբաժնով ավիաընկերություններ ստեղծելու համաշխարհային փորձում կան և՛ դրական դեպքեր, և՛ բացասական: Այս մասին այսօր՝ հոկտեմբերի 14-ին, կառավարության նիստում նշեց Էկոնոմիկայի նախարար Վահան Քերոբյանը՝ անդրադառնալով «Էյր Արաբիայի» եւ ՀՀ կառավարության կողմից ստեղծվող նոր ազգային ավիաընկերությանը:

Նա բերեց Ղազախստանի դրական օրինակը, որի ազգային ավիափոխադրողը ստեղծվել էր բրիտանական խոշոր ընկերության հետ համատեղ եւ շատ հաջող ընթացք ունեցել: 

Բարձր տեխնոլոգիական արդյունաբերության նախարար Վահագն Խաչատրյանն էլ հայտնեց, որ միջազգային փորձում ավելի շատ են պետական բաժնեմասերով ազգային ավիափոխադրող ստեղծելու բացասական փորձերը:

«Պետությունն իր դերն ունի, եւ այստեղ ամենամեծ անհանգստությունն այն է, որ մենք կարողանանք հավասար հնարավորություններ ապահովել այն ընկերությունների համար, որոնք կան, այսօր աշխատում են եւ որոնք ցանկություն ունեն մտնելու շուկա: Սովորաբար, պետության մասնակցությամբ ավիաընկերությունները քիչ հաջողություններ են ունենում: Կարելի է բերել «Ալ Իտալիայի» կամ «Էյր Ֆրանսի» օրինակները: Այստեղ շատ կարեւոր է խաղի կանոնների պահպանումը, հատկապես՝ կարգավորող մարմինների կողմից: Որովհետեւ եթե օգտագործվի պետական լինելու հանգամանքը, գյություն ունեցող շուկան կքանդվի»,- ասաց նա:

«Լավ լուրն այն է, որ շուկա չկա, որ քանդվի, դա միաժամանակ և՛ լավ լուր է, և՛ վատ լուր է»,-արձագանքեց Նիկոլ Փաշինյանը: