Ընտրվել է ՀՕՄ-ի Արցախի միավորի նոր վարչություն

Հոկտեմբերի 2-ին Ստեփանակերտում կայացել է Հայ Օգնության Միության Արցախի մեկուսի մասնաճյուղի տարեկան ընդհանուր 17-րդ անդամակցական ժողովը։

Համավարակի և պատերազմի պատճառով նախորդ երկու տարիներին ժողովը չի կայացել։ Այդ իսկ պատճառով Ստեփանակերտի «Սոսե» մանկապարտեզի շենքում հրավիրված ժողովը քննել ու գնահատական է տվել ՀՕՄ-ի Արցախի միավորի վարչության 26-ամսյա գործունեությանը։

Ժողովին մասնակցում էին նաև ՀՕՄ-ի Կենտրոնական Վարչության անդամ Համեստ Սասունյանը, ՀՅԴ Արցախի Կենտրոնական կոմիտեի անդամ Ալյոնա Գրիգորյանը։ Ժողովականներն արժևորել են պատերազմի օրերին ՀՕՄ-ի աշխարհասփյուռ կառույցի, այդ թվում` Արցախի միավորի ծավալած գործունեությունը, արցախցուն հոգեբանական, նյութական ու բարոյական աջակցություն ցուցաբերելուն ուղղված ծրագրերը։

Նաև առաջարկներ են ներկայացվել առաջիկա միամյա գործունեության վերաբերյալ` շեշտը դնելով Արցախում իրականացվող կրթական, մասնագիտական պատրաստվածությանը, երեխաների զարգացմանն ուղղված ծրագրերին։Ժողովի վերջում ընտրվել է նոր վարչություն։ ՀՕՄ-ի Արցախի միավորի ատենապետուհի է ընտրվել Լիլիթ Մարտիրոսյանը։