Բաքուն ինքը չի ճանաչել իր սահմանները, մենք ինչի՞ ճանաչենք․ Փաշինյանը խոստացավ ուսումնասիրել փաստերը

Բաքուն ինքը չի ճանաչել իր սահմանները, մենք ինչի՞ ճանաչենք. կառավարության հարցուպատասխանի ժամանակ ասաց «Հայաստան» խմբակցության պատգամավոր Արթուր Խաչատրյանը:

Նա, մինչ կառավարությանն ուղղված հարց հնչեցնելը, կատարեց երկու հաստատում. 

1. Հայաստանի ու Ադրբեջանի միջև երկկողմանի հարաբերությունները, եթե դրանք կարելի է այդպիսին կոչել, կանոնակարգվում են երկու փաստաթղթով՝ 1994 թվականի մայիսի 12-ի կրակի դադարեցման մասին եռակողմ (Հայստանի Հանրապետություն, Լեռնային Ղարաբաղի Հանրապետություն, Ադրբեջանական Հանրապետություն) հայտարարությամբ և 2021 թվականի նոյեմբերի 9-ի եռակողմ հայտարարությամբ, որն, ըստ էության դարձյալ կրակի դադարեցման համաձայնություն էր՝ շատ ավելի վատ պայմաններով: Հետևաբար, իրավական առումով, Ադրբեջանի հետ հարաբերություններն այսօր ավելի բարձր մակարդակի վրա չեն:
2. Անառարկելի է, որ երկու հարևան երկրների միջև սահմանները պետք է զատված և գծված լինեն: Որպես կանոն, այդ գործընթացն իրականացվում է, երբ երկրների միջև հաստատված են դիվանագիտական հարաբերություններ, իսկ ռազմական կոնֆլիկտների դեպքում, կոնֆլիկտի հանգուցալուծումից  հետո, երբ ստորագրվում է խաղաղության պայմանագիր՝ երկկողմանի կամ բազմակողմանի: Տրամաբանությունը պարզ է. եթե սահմանների շուրջ համաձայնություն չի ձևավորվում, նոր կոնֆլիկտի հավանականությունը շատ մեծ է: Հայաստանի և Ադրբեջանի միջև պարագան այլ է:

«Եթե ՀՀ այսօրվա իշխանություններն այլ ուղի են ընտրել և սկսել են սահմանագծման և սահմանազատման գործընթացը, որը կառավարությունը կոչում է սահմանային կետերի ճշտում, ապա ինչու՞ այդ գործընթացը չէր նախձեռնվել մինչև 2020 սեպտեմբերի 26-ը, երբ մեր դիրքերն անհամեմատ ավելի բարվոք էին»,- հարցրեց Արթուր Խաչատրյանը:

Պատգամավորի համար նաև անհասկանալի է, թե ինչու՞ է վեճի կարգավորման յուրիսդիկցիա ընտրվել ՀՀ վարչատարածքային բաժանման մասին օրենքը, որի մասին ինքը խոսել էր կառավարության ծրագրի ներկայացման ժամանակ և հստակ պատասխան չէր ստացել, այլ օրինակ Պետական Անկախության վերականգնման վերաբերյալ Ադրբեջանական Հանրապետության 1991թ. հոկտեմբերի 18-ի սահմանադրական ակտով, որի երրորդ հոդվածն ասում է հետևյալը. “Договор об образовании СССР от 30 декабря 1922 г. является недействительным с момента подписания в части, относящиеся к Азербайджану.

Все вытекающие вопросы взаимоотношений с входившими в состав бывшего Союза ССР суверенными государствами подлежат урегулированию на основе договоров и соглашений”.

Հարցին պատասխանեց Նիկոլ Փաշինյանը:

Պատգամավորի հարցի և նախարարի պատասխանի տեսանյութն ամբողջությամբ՝ ստորև: