ԱՄՆ-ը ցանկանում է արտադրել Sputnik V պատվաստանյութը

ԱՄՆ-ը մտադիր է արտադրել կորոնավիրուսի դեմ ռուսական Sputnik V պատվաստանյութը՝ երրորդ երկրներ արտահանելու համար: Այս մասին «ՌԻԱ Նովոստի»-ին տված հարցազրույցում ասել է Ռուսաստանի Դաշնությունում Ամերիկայի առևտրի պալատի ղեկավար Ալեքսիս Ռոձյանկոն:

Նրա խոսքով՝ ամերիկյան դեղագործական ընկերությունները բանակցություններ են վարում Sputnik V-ի արտադրության հնարավորության շուրջ՝ Ռուսաստանի ուղղակի ներդրումների հիմնադրամի հետ:

Ռոձյանկոն նշել է, որ Գամալեյայի կենտրոնի մասնագետների ստեղծած պատվաստանյութը շարունակում է միջազգային համբավ ստանալ:

Հիշեցնենք, որ ռուսական դեղամիջոցը դարձավ աշխարհում գրանցված առաջին պատվաստանյութը կորոնավիրուսի դեմ: Sputnik V-ն կիրառվում է 70 երկրում, իսկ պատվաստանյութը հաստատած բոլոր երկրների ընդհանուր բնակչությունը 4 միլիարդ է, ինչը կազմում է աշխարհի բնակչության ավելի քան 50%-ը:

Այնուամենայնիվ, դեղամիջոցը դեռ ճանաչված չէ ինչպես ԱՄՆ-ում, այնպես էլ Եվրամիությունում: Պետությունները դա բացատրում են կողմնակի ազդեցությունների  վերաբերյալ անբավարար տեղեկատվությամբ և անավարտ հետազոտություններով: