Ռոհանիի կառավարման օրոք պարզ դարձավ, որ չի կարելի վստահել Արևմուտքին. Իրանի հոգևոր առաջնորդ

Իրանի Գերագույն հոգևոր առաջնորդ այաթոլլա Ալի Խամենեին հայտարարել է, որ Հասան Ռոհանիի նախագահության օրոք ակնհայտ է դարձել, որ Արևմուտքին վստահելն իմաստ չունի, և նոր կառավարությունը պետք է դրանից դաս քաղի: Այս մասին Խամենեին ասել է նախագահ Հասան Ռոհանիի և մեկ շաբաթից լիազորությունները հանձնող կառավարության անդամների հետ հանդիպման ժամանակ։

Նրա խոսքով՝ Ռոհանիի կառավարության գործողությունները մի շարք ոլորտներում արդարացրել են սպասելիքները, իսկ մյուսներում՝ ոչ:

«Այս իշխանության օրոք պարզ դարձավ, որ Արևմուտքին չի կարելի վստահել: Սա կարևոր փորձ է, և նոր կառավարությունը պետք է օգտվի դրանից: Նրանք մեզ չեն օգնի և առաջին իսկ հնարավորության դեպքում հարվածներ են հասցնելու: Եթե նրանք այժմ դա չեն անում, ապա միայն այն պատճառով, որ բավարար ուժ չունեն»,- ասել է Խամենեին:

Նա մեկնաբանել է նաև միջուկային համաձայնագրի շուրջ Վիեննայում շարունակվող բանակցությունները: «Միացյալ Նահանգները շարունակում էին պնդել սեփական տեսակետը և ոչ մի քայլ չեն կատարում: Ամերիկացիները խոստանում են, որ կհանեն պատժամիջոցները, սակայն դա չեն անում»,- ասել է Խամենեին: