«Թալիբանի» հետ բանակցություններն անհրաժեշտ են. Կրեմլ

Ռուսաստանի նախագահի մամուլի քարտուղար Դմիտրի Պեսկովը հայտարարել է, որ անհրաժեշտ է Մոսկվայում թալիբների ներկայացուցիչների հետ բանակցություններ վարել:

Պեսկովն ասել է, որ ՌԴ նախագահ Վլադիմիր Պուտինը տեղյակ է «Թալիբան» շարժման պատվիրակության՝ Ռուսաստան այցի մասին, այդ կապերն անհրաժեշտ են` Աֆղանստանում տիրող լարված իրավիճակի ֆոնին:

«Կապերն անհրաժեշտ են այն ֆոնին, թե որքան լարված է զարգանում իրավիճակը Աֆղանստանում, ինչպես է զարգանում իրավիճակը Աֆղանստանի և Տաջիկստանի սահմանին: Այս բանակցություններն անհրաժեշտ են»,- հավելել է նա:

Ավելի վաղ ՌԴ ԱԳՆ-ն հայտնել էր, որ Աֆղանստանում Ռուսաստանի նախագահի հատուկ բանագնաց Զամիր Քաբուլովը բանակցություններ կվարի Մոսկվայում «Թալիբան»-ի պատվիրակության հետ:

ԱՄՆ-ը և «Թալիբան»-ը խաղաղության պայմանագիր ստորագրեցին Դոհայում 2020 թվականի փետրվարի 29-ին, և Վաշինգտոնը խոստացավ մինչ մայիսի 1-ը օտարերկրյա զորքերը դուրս բերել Աֆղանստանից:

Թալիբներն իրենց հերթին խոստացել են կանխել «Ալ Քաիդա»-ի և ապստամբ այլ կազմակերպությունների գործունեությունը իրենց վերահսկողության տակ գտնվող տարածքներում, ինչպես նաև շարունակել մասնակցել խաղաղ բանակցություններին: