Շիրակի և Վայոց ձորի մարզպետների տեղակալներն ազատվել են պաշտոններից

Շիրակի և Վայոց ձորի մարզպետների տեղակալներն ազատվել են պաշտոններից: Այս մասին համապատասխան որոշումները հրապարակվել են e-gov.am հարթակում: Մասնավորապես՝  վարչապետի պաշտոնակատարի որոշմամբ Դավիթ Սեխելյանն ազատվել է Շիրակի, Նանե Ասատրյանը՝ Վայոց ձորի մարզպետի տեղակալի պաշտոնից:

Նանե Ասատրյանն այդ պաշտոնը զբաղեցնում էր 2018թ.հունիսի 29-ից, Դավիթ Սեխելյանը՝ 2021 թվականի փետրվարի 4-ից: 

Հատկանշական է, որ ինչպես վերջին տարիների գրեթե բոլոր ազատումների դեպքում, այս անգամ էլ որևէ պատճառաբանություն կամ հիմնավորում չի նշվում, թե ինչու են վերջիններն ազատվել իրենց զբաեցրած պաշտոններից:  

Հավելենք նաեւ, որ Նանե Ասատրյանը ծնվել է 1982թ.,  Վայոց ձորի մարզի Եղեգնաձոր քաղաքում: Սովորել և ավարտել է Երևանի Խ. Աբովյանի անվան մանկավարժական համալսարանի հեռուստալրագրություն բաժնում: Երկար տարիներ զբաղվել է լրագրողական գործունեությամբ: 

Դավիթ Սեխելյանը ծնվել է 1976թ.,  Շիրակի մարզի Փանիկ գյուղում:  Եղել է «ՎՏԲ-Հայաստան բանկ » ՓԲԸ Արթիկի մասնաճյուղ՝ տնտեսագետ, « Հայբիզնեսբանկ» ՓԲԸ Մալաթիա մասնաճյուղ՝ կառավարիչի տեղակալ և վարկային բաժնի պետ, «Արմենիա Ինշուրանս» ԱՍՊԸ՝ ոչ անձնական պահանջների կարգավորման վարչության մասնագետ: 2012 թվականից հիմնել է սեփական ֆերմերային տնտեսությունը: