ԱՄՆ-ը հորդորել է հարգել Հայաստանում ընտրությունների արդյունքները

ԱՄՆ պետդեպարտամենտը, ի դեմս խոսնակ Նեդ Փրայսի, շնորհավորել է Հայաստանի ժողովրդին անցած խորհրդարանական ընտրությունների կապակցությամբ և կոչ արել հարգել դրանց արդյունքները: Համապատասխան հաղորդագրությունը տեղադրված է պետդեպարտամենտի կայքում:

Վաշինգտոնը ողջունել է ԵԱՀԿ/ԺՀՄԻԳ առաքելության ընդհանուր դրական գնահատումը՝ շեշտելով, որ գոհ է նախնական եզրակացություններից: Այնուամենայնիվ, Փրայսը մատնանշել է մտահոգությունները «հիմնական դերակատարների ինտենսիվ բևեռացման և սրացող հռետորաբանության վերաբերյալ»:

«Մենք կոչ ենք անում բոլոր քաղաքական համոզմունքներ ունեցող հայերին՝ հարգել այս ընտրությունների արդյունքները դրանց հաստատումից հետո, օգտագործել ընտրությունների վերաբերյալ բողոքների քննարկման իրավական գործընթացը` մտահոգիչ խնդիրները լուծելու և քաղաքական բռնաճնշումներից խուսափելու համար»,- ասվում է հայտարարության մեջ: