ԱՄՆ-ն ու արևմտյան մի շարք երկրների արտգործնախարարներ դատապարտել են Սիրիայում ընտրությունները և հորդորել չճանաչել դրանց արդյունքները

Մեծ Բրիտանիայի, ԱՄՆ-ի, Գերմանիայի, Ֆրանսիայի և Իտալիայի արտաքին գործերի նախարարները միջազգային հանրությանը կոչ են արել չճանաչել Սիրիայում սպասվող նախագահական ընտրությունները: Համապատասխան հայտարարությունը հրապարակել է Բրիտանիայի արտաքին գործերի նախարարությունը:

«Մենք՝ Ֆրանսիայի, Գերմանիայի, Իտալիայի, Միացյալ Թագավորության և Միացյալ Նահանգների արտգործնախարարներս, ցանկանում ենք հասկացնել, որ Սիրիայում մայիսի 26-ին կայանալիք նախագահական ընտրությունները չեն լինի ազատ և արդար»,- ասվում է հայտարարության մեջ:

Արտգործնախարարները դատապարտել են Սիրիայի նախագահ Բաշար ալ Ասադի՝  նախագահական ընտրություններ անցկացնելու որոշումը:

«Մենք կոչ ենք անում միջազգային հանրությանը՝ անվերապահորեն մերժել Ասադի վարչակարգի օրինականությունը ապահովելու փորձը՝ առանց վերացնելու մարդու իրավունքների լուրջ խախտումները և մասնակցությունը ՄԱԿ-ի կողմից սկսված քաղաքական գործընթացներին՝ հակամարտությունը դադարեցնելու համար»,- ասվում է հայտարարության մեջ:

Ավելի վաղ ՌԴ Պետդումայի միջազգային հարաբերությունների հանձնաժողովի ղեկավար Լեոնիդ Սլուցկին հայտարարել էր, որ Պետդուման Սիրիայի ժողովրդական խորհրդի կողմից հրավեր է ստացել դիտորդներ ուղարկել Սիրիայի նախագահական ընտրություններին:

Սիրիայում նախագահական ընտրությունները նշանակված են 2021 թվականի մայիսի 26-ին: