Էրդողանը Եգիպտոսին հորդորում է առավելագույնի հասցնել համագործակցությունը Թուրքիայի հետ

Եգիպտոսի հետ տարիներ շարունակ լարված հարաբերություններից հետո Թուրքիան ձգտում է վերականգնել կապերը Եգիպտոսի հետ. հայտարարել է Թուրքիայի նախագահ Ռեջեփ Թայիփ Էրդողանը:

«Մենք հույս ունենք առավելագույնս համագործակցել Եգիպտոսի և Պարսից ծոցի երկրների հետ փոխշահավետ հիմքերի վրա»,- ըստ TRT-ի՝ ասել է նա:

Էրդողանի խոսքով՝ Թուրքիան և Եգիպտոսը համագործակցության լուրջ հնարավորություններ ունեն Արևելյան Միջերկրական ծովից մինչև Լիբիա՝ շատ ոլորտներում:

«Թուրքիայի և Եգիպտոսի ժողովուրդների միջև կա պատմական միասնություն: Այս հիմքի վրա զարգանում են մեր հարաբերությունները պետությունների միջև: Մենք վճռական ենք այս գործընթացը վերսկսելու համար»,- ասել է Թուրքիայի ղեկավարը:

Արտաքին գործերի փոխնախարար Սեդաթ Օնալի գլխավորած թուրքական պատվիրակությունը մայիսի սկզբին Կահիրեում դիվանագիտական բանակցություններ էր վարում: Այցը տեղի էր ունեցել տարածաշրջանային երկու մրցակիցների մերձեցման շրջանակներում: Եգիպտոսը և Թուրքիան պայմանավորվել են բարձրացնել արտաքին գործերի նախարարությունների շփումների մակարդակը իրենց հետախուզական պաշտոնյաների հանդիպումներից հետո: