Թուրքիան շնորհակալություն է հայտնել Անկարայի դեմ պատժամիջոցներ կիրառած երկրներին

Թուրքիայի պաշտպանական արդյունաբերության հետ կապված՝ մի շարք արևմտյան երկրների սահմանափակումները թույլ տվեցին Անկարային՝ մշակել ռազմաարդյունաբերական համալիրի զարգացման ավելի ռացիոնալ ծրագիր։ Այս մասին Twitter- ում գրել է Թուրքիայի նախագահի աշխատակազմին կից պաշտպանական արդյունաբերության տնօրինության ղեկավար Իսմայիլ Դեմիրը:

«Էմբարգոյի լույսի ներքո մենք ավելի լավ գիտակցեցինք, թե մեզ ինչ է պետք, ինչ պետք է արտադրվի ներքին ձեռնարկություններում և արագացրեցինք այս գործընթացը»,- Anadolu-ն մեջբերում է Դեմիրի խոսքերը:

«Պատժամիջոցները թույլ տվեցին մեզ ճշգրտել պաշտպանական արդյունաբերության զարգացման ընթացքը: Ուստի մենք միայն երախտապարտ ենք այն երկրներին, որոնք նման սահմանափակումներ են մտցնում: Ոչ ոք չի կարող փոխել Թուրքիայի՝ լիովին անկախ պաշտպանական արդյունաբերության ձևավորման ուղին»,- գրել է Դեմիրը: