Պուտինն ու Էրդողանը քննարկել են Արցախյան հակամարտության կարգավորման հարցը

Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ։ Այս մասին տեղեկացնում է Կրեմլի մամուլի ծառայությունը։

Ի թիվս այլ հարցերի, անդրադարձ է կատարվել Արցախի հակամարտության կարգավորման խնդրին: 

«Ռեջեփ Թայիփ Էրդողանը բարձր է գնահատել Ռուսաստանի քայլերը իրավիճակի հետագա կայունացման ապահովման, 2021 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների շարունակական իրականացման ուղղությամբ:

Վլադիմիր Պուտինը Թուրքիայի նախագահին տեղեկացրել է Հայաստանի եւ Ադրբեջանի ղեկավարների հետ վերջերս ունեցած շփումների արդյունքների մասին: Երկուստեք կարծիք է հայտնվել Հարավային Կովկասում տրանսպորտային ենթակառուցվածքի վերականգնման աշխատանքների ակտիվացման անհրաժեշտության մասին»,- նշված է Կրեմլի տարածած հաղորդագրության մեջ:

Հիշեցնենք, որ երեկ էլ, Մոսկվայից Փաշինյանի վերադարձից կարճ ժամանակ հետո, Ռուսաստանի նախագահը հեռախոսազրույց է ունեցել Ադրբեջանի նախագահի հետ։ Հեռախոսազրույցի ընթացքում շարունակվել են Արցախի իրավիճակի, դրա հետագա կայունացման, Ռուսաստանի, Հայաստանի և Ադրբեջանի ղեկավարների 2020 թ. նոյեմբերի 9-ի եւ 2021 թ. հունվարի 11-ի հայտարարությունների շուրջ քննարկումները։