Պուտինն ու Էրդողանը հեռախոսով քննարկել են Երուսաղեմի իրավիճակը և այնտեղ խաղաղապահ զորք ուղարկելու հարցը

Թուրքիայի նախագահ Ռեջեփ Թայիփ Էրդողանը չորեքշաբթի Ռուսաստանի առաջնորդ Վլադիմիր Պուտինի հետ քննարկել է Երուսաղեմում և, ըդնհանուր առմամբ, արաբա-իսրայելական հակամարտության գոտում տիրող իրավիճակը: Այս մասին հայտնում է թուրքական NTV հեռուստաալիքը:

Թուրքիայի նախագահը նշել է, որ խնդրի լուծման համատեքստում «կարևոր ուղերձ է Երուսաղեմի վերաբերյալ Թուրքիայի և Ռուսաստանի դիրքորոշումների նմանությունը»:  Նա կարևորել է ՌԴ ԱԳՆ հայտարարությունները Երուսաղեմի հիմնախնդրի կարգավորման վերաբերյալ՝ ՄԱԿ-ի որոշումների և երկու պետությունների սկզբունքի հիման վրա:

Էրդողանը մատնանշել է ստեղծված իրավիճակում ՄԱԿ-ի Անվտանգության խորհրդի շտապ միջամտության անհրաժեշտությունը: ՄԱԿ-ը, նրա համոզմամբ, «պետք է կոշտ և վճռական դիրքորոշում ցուցաբերի, որպեսզի Իսրայելը դադարեցնի հարձակումները Գազայի հատվածի վրա»:

Նա առանձին ընդգծել է, որ «անհրաժեշտ է մշակել պաղեստինցիներին պաշտպանելու համար տարածաշրջան միջազգային խաղաղապահ ուժեր ուղարկելու հարցը», և համոզմունք հայտնել, որ «Թուրքիան և Ռուսաստանը ՄԱԿ-ի հարթակում սերտ համագործակցություն կցուցաբերեն այդ հարցերի շուրջ»: