ԵՄ-ն կոչ է անում ակտիվորեն համագործակցել Թուրքիայի հետ

ԵՄ արտաքին հարաբերությունների և անվտանգության քաղաքականության գերագույն ներկայացուցիչ Ժոզեպ Բորելը մարտի 29-ին կայացած մամուլի ասուլիսում հայտարարել է, որ Բրյուսելը պետք է շարունակի ակտիվորեն համագործակցել Թուրքիայի հետ և բոլոր հարցերում ավելի կառուցողական դիրքորոշում ունենալ: Այդ մասին հայտնում է թուրքական Haber7 լրատվական գործակալությունը:

Նա հիշեցրել է, որ անցյալ շաբաթ ԵՄ առաջնորդների գագաթնաժողովում որոշվել է համագործակցել Թուրքիայի հետ ընդհանուր հետաքրքրություն ներկայացնող ոլորտներում՝ մաքսային միության ստեղծումից մինչև միգրացիայի խնդիր:

«Թուրքիայի և ԵՄ-ի հարաբերություններում նախկինում շատ լարվածություն կար, վերջերս իրավիճակը փոխվել է դեպի լավը: Անցյալ շաբաթվա սկզբին՝ ԵՄ արտգործնախարարների հետ հանդիպման ժամանակ, մենք համաձայնության եկանք ընդհանուր հռետորաբանության և Արևելյան Միջերկրական ծովի իրադրության բարելավման շուրջ»,- ասել է նա:

Բորելը նաև նշել է, որ կան նաև Թուրքիայի կողմից անհանգստացնող գործողություններ ներքին խնդիրները լուծելիս, օրինակ՝ Ժողովուրդների դեմոկրատական կուսակցության փակման դատավարությունը և Անկարայի դուրս գալը Ստամբուլի կոնվենցիայից: