Ղարաբաղում պատերազմից հետո շուրջ 1000 զինծառայող հաշմանդամության տարբեր խմբեր է ստացել

Ղարաբաղում պատերազմից հետո շուրջ 1000 զինծառայող հաշմանդամության տարբեր խմբեր է ստացել: Այս մասին այսօր Ազգային ժողովի նիստին, պատասխանելով պատգամավորների հարցերին, հայտարարեց ՀՀ աշխատանքի եւ սոցիալական հարցերի նախարար Մեսրոպ Առաքելյանը:

Նախարարը նշեց, որ այս պահին Ղարաբաղում պատերազմի ընթացքում վիրավորված զինծառայողների բժշկասոցիալական փորձաքննությունն ավարտական փուլում է եւ որ արդեն նախնական պատկեր կա: Այդպես, լուրջ վնասվածքներ է ստացել մոտ 500 քաղաքացի (1-ին եւ 2-րդ հաշմանդամության խումբ), որոնցից մոտ 150 մարդ 1-ին խումբն է կազմում:

«Պրոթեզավորման կարիք ունի մոտ մոտ 120 մարդ: Մոտ 500-ն աննշան վնասվածքներ է ստացել եւ հաշմանդամության 3-րդ խումբ կստանա կամ արդեն ստացել է: Ընդհանուր առմամբ, այս պահի դրությամբ մենք հաշմանդամության խումբ ենք տրամադրել շուրջ 1000 քաղաքացու»,- ասաց Առաքելյանը:

Նա շեշտեց, որ մոտ ապագայում քաղաքացիների պրոթեզավորումն իրականացվելու է խմբերով՝ կախված անդամահատման տեսակից: Այն կիրականացվի միջազգային չափանիշներին համապատասխան: «Պրոթեզները ձեռք են բերվել պրոթեզավորման արեւմտյան կենտրոններից»,- ասաց նախարարը: