Թուրքիայի եւ Հունաստանի միջև բանակցությունները տեղի կունենան մարտի 16-ին Աթենքում

Թուրքիան և Հունաստանը մտադիր են բանակցությունների երկրորդ փուլն անցկացնել Աթենքում մարտի 16-17-ը՝ ծովային վեճերը կարգավորելու համար. հայտնում է թուրքական ԱԳՆ–ն։

Հայտարարությունը հրապարակվել է փետրվարի վերջին՝ Եվրամիության գագաթնաժողովին ընդառաջ, որի ժամանակ դաշինքի անդամ պետությունների ղեկավարները քննարկել են երկու կողմերի տարածքային պահանջները և Թուրքիայի դեմ պատժամիջոցներ կիրառելու հարցը` Արևելյան Միջերկրական ծովի վիճահարույց ջրերում նավթի և գազի հետախուզման համար:

Հիշեցնենք, որ Թուրքիան ներգրավված է ինչպես Հունաստանի, այնպես էլ Կիպրոսի հետ վեճերում Էգեյան և Միջերկրական ծովերի տարածքային ջրերի շուրջ: Անկարան այս ամառ նավեր էր ուղարկել Կիպրոսի ափերի մոտ՝ գազի արդյունահանման համար հորատման աշխատանքներ իրականացնելու՝ սրելով լարվածությունը:

ԵՄ առաջնորդները դեկտեմբերին պատժամիջոցներ են սահմանել այն անձանց նկատմամբ, որոնք մասնակցում են Թուրքիայի հորատման գործողություններին Արևելյան Միջերկրական ծովի վիճահարույց ջրերում, բայց Թուրքիայի տնտեսությունն ուղղակիորեն չեն ենթարկել պատժամիջոցների՝ խոստանալով մարտին վերանայել իրավիճակը: