ԱԺ-ն կբացվի այն ժամանակ, երբ քաղաքական մեծամասնությունը կգա խորհրդարան գերագույն գլխավոր դավաճանի հրաժարականի օրակարգով․ Իշխան Սաղաթելյան

Մենք շարունակելու ենք փակ պահել ԱԺ մուտքերն այնքան ժամանակ, քանի դեռ քաղաքական մեծամասնությունը գերագույն գլխավոր դավաճանի հրաժարականի պահանջ չի ներկայացրել: Այս մասին ֆեյսբուքյան իր էջի ուղիղ եթերում նշում է Հայրենիքի փրկության շարժման համակարգող Իշխան Սաղաթելյանը:

Նա տեղեկացնում է, որ ամբողջ գիշեր քաղաքացիները արգելափակած են պահել խորհրդարանի շենքի մուտքերը, գիշերը Բաղրամյան և Դեմիրճյան փողոցներում անցել է խաղաղ, առանց միջադեպերի: Այսօր ևս ողջ օրվա ընթացքում Բաղրամյան և Դեմիրճյան փողոցները փակ են լինելու:

«ԱԺ-ն կբացվի այն ժամանակ, երբ քաղաքական մեծամասնությունը կգա խորհրդարան գերագույն գլխավոր դավաճանի հրաժարականի օրակարգով: Մենք պինդ ենք, ամուր ենք, անկոտրում ենք: Հոգնել չկա, հետքայլ չկա, մինչեւ վերջ գնալու ենք»,- ասում է Սաղաթելյանը: