Ռուսաստանը, Թուրքիան և Իրանը հայտարարել են Սիրիայի անբաժանելիության մասին

Ռուսաստանը, Թուրքիան և Իրանը վերահաստատել են իրենց անփոփոխ հավատարմությունը Սիրիայի ինքնիշխանությանն ու տարածքային ամբողջականությանը:

«Նրանք վերահաստատել են իրենց անփոփոխ հավատարմությունը Սիրիայի Արաբական Հանրապետության ինքնիշխանությանը, անկախությանը, միասնությանը և տարածքային ամբողջականությանը, ինչպես նաև ՄԱԿ-ի կանոնադրության նպատակներին և սկզբունքներին, նաև՝ շեշտել, որ այդ սկզբունքները ենթակա են համընդհանուր պահպանման ու հարգանքի»,– ասվում է երեք երկրների համատեղ հայտարարության մեջ, որը հաջորդել է Սիրիայի վերաբերյալ Աստանայի ձևաչափով 15-րդ միջազգային հանդիպումներին. հայտնում է ՏԱՍՍ-ը:

Ռուսաստանը, Թուրքիան, Իրանը նաև պայմանավորվել են շարունակել համագործակցությունը Սիրիայում ԻՊ-ի և «Ջաբհաթ ան Նուսրա» խմբավորումների ահաբեկիչներին վերջնականապես վերացնելու գործում:

Մոսկվան, Անկարան և Թեհրանը դատապարտում են սիրիական նավթի վաճառքից ստացված եկամուտների ապօրինի բռնագրավումն ու փոխանցումը: «Կողմերը վերահաստատել են Սիրիայի Արաբական Հանրապետությանը պատկանող նավթի եկամուտների ապօրինի բռնագրավման և փոխանցման անընդունելիությունը», - ասվում է փաստաթղթում:

Ռուսաստանի Դաշնությունը, Թուրքիան և Իրանը դեմ են արտահայտվել Սիրիայի սահմանադրական հանձնաժողովի աշխատանքներին օտարերկրյա միջամտությանը։